ინციდენტი აზერბაიჯანის ქალაქ გაბალაში, ადგილობრივ გუნდ „გაბალასა" და თბილისის „დინამოს"  მატჩზე მოხდა. სოციალურ ქსელში გავრცელდა ვიდეოკადრები, სადაც ჩანს, რომ საფეხბურთო მატჩზე მისულ  აზერბაიჯანელ გულშემატკივართა ერთ ჯგუფს ჰქონდა პლაკატები ინგლისურ და აზერბაიჯანულ ენებზე: „Burchali is ancient Azerbaijan land" („ბორჩალო უძველესი აზერბაიჯანული მიწაა"); „Sarvan no Marneuli", „Bostandere No Rustavi" და „Choruk Gemerli! No Bolnisi!" გავრცელებულ ვიდეოკადრებში ჩანს, რომ მატჩზე მისულ გულშემატკივრებს ეს პლაკატები პოლიციამ ჩამოართვა. აზერბაიჯანული მედიის ინფორმაციით, მატჩის დროს აზერბაიჯანელმა გულშემატკივრებმა ქართული დროშა დაწვეს. გავრცელდა ფოტოები, სადაც საქართველოს დროშაზე ფეხით დგანან.

აღნიშნულ ფაქტს გულშემატკივრები უკავშირებენ 2 ივლისს, საქართველოში, „დინამო"-„გაბალას" თამაშის დროს მომხდარ შემთხვევას, როდესაც ქართველმა გულშემატკივრებმა გამოფინეს პლაკატი წარწერით - „ჩვენ გვახსოვს ზაქათალა, კახი, 1921"".

აზერბაიჯანულ „გაბალასა" და თბილისის „დინამოს" მატჩზე გუშინ მომხდარ ინციდენტთან დაკავშირებით „დინამოს" კლუბის ხელმძღვანელობა უეფა-ს მიმართავს. განცხადება „რუსთავი 2"-თან საუბრისას „დინამოს" აღმასრულებელმა დირექტორმა ნიკოლოზ ჯღარკავამ გააკეთა.

მისი განმარტებით, მატჩზე იყვნენ კონცენტრირებული და საქართველოს დროშის დაწვის ფაქტი არ შეუმჩნევიათ.