გორში სასჯელაღსრულების სისტემის თანამშრომელმა თავი ჩამოიხრჩო. 29 წლის გიორგი ოქროპირიძემ თავი საკუთარი საცხოვრებელი სახლის სარდაფში მოიკლა. თვითმკვლელობის მიზეზი ჯერჯერობით უცნობია. მომხდართან დაკავშირებით ადგილობრივმა სამართალდამცველებმა გამოძიება უკვე დაიწყეს.
ოჯახის წევრები თვითმკვლელობის ვერსიას ვერ ასახელებენ. გიორგი ოქროპირიძე სასჯელაღსრულების სისტემაში მუშაობდა, მას მეუღლე და მცირეწლოვანი შვილი ჰყავდა. ოქროპირიძემ რამდენიმე წელი რუსთავის სასჯელაღსრულების ერთ-ერთ დაწესებულებაშიც იმუშავა, შემდეგ სამსახური შეიცვალა, მოგვიანებით კი კვლავ აღნიშნულ სისტემას დაუბრუნდა.
ოჯახის წევრების თქმით, გარდაცვლილი ეკლესიურად ცხოვრობდა, მას რუის-ურბნისის ეპარქიაში მოძღვარი ჰყავდა და სუიციდის მიზეზი არ ჰქონია. ოჯახის ახლობლების ინფორმაციით კი ოქროპირიძე გარკვეული პირადი პრობლემების გამო მედიკამენტებს იღებდა.
