მსოფლიოში ცნობილი ქართველი პიანისტი ელისო ბოლქვაძე ჩინეთში ორკვირიან საკონცერტო ტურნეს გამართავს და მასტერკლასებს ჩაატარებს. ცნობილი პიანისტი კონცერტებს პეკინის, შანხაის, ტიანჯინის, ნანჯინგის, ქსიამენის და ცინგუას ფილარმონიისა და თეატრების დიდ საკონცერტო დარბაზებში ჩაატარებს. ასევე დაგეგმილია ორი მასტერკლასის გამართვა შანხაისა და პეკინის კონსერვატორიის სტუდენტებისათვის.
ელისო ბოლქვაძე ჩინელი მსმენელის წინაშე, სოლო კონცერტების დიდი და შეკვეცილი პროგრამით წარსდგება. პიანისტი ბეთჰოვენის, შოპენის, სონის და პროკოფიევის საფორტეპიანო ნაწარმოებებს შეასრულებს.
ცნობილი პიანისტის სადებიუტო კონცერტები ჩინეთში 1-დან 12 ნოემბრის ჩათვლით გაიმართება. თუმცა შესაძლებელია დამატებითი კონცერტებიც დაინიშნოს.
როგორც პიანისტი აცხადებს, ჩინეთის ბაზარი ძალიან საინტერესოა. იგი სამომავლოდ, ტურნეს მოწყობას სიმფონიურ ორკესტრთან ერთად ჩინეთის სხვა ქალაქებშიც გეგმავს. რაც შეეხება სხვა სამომავლო გეგმებს, ელისო ბოლქვაძის სოლო კონცერტები დაგეგმილია შვეიცარიაში, ამერიკაში, ესპანეთში, გერმანიაში, მოსკოვსა და ნიდერლანდებში.
