სოფლების: ხურვალეთის და წითელუბნის მიმდებარე ტერიტორიაზე, სადაც რამდენიმე დღის წინ დე-ფაქტო სამხრეთ ოსეთის ე.წ. სახელმწიფო საზღვრის აღმნიშვნელი მწვანე ბანერი იყო დამონტაჟებული, ცოტა ხნის წინ შეიარაღებული ფორმიანები გამოჩნდნენ. მათ მედიის წარმომადგენლების აქციის დროს მოგლეჯილი ბანერის ადგილზე დამონტაჟებული დროშა ჩამოხსნეს.
შეიარაღებული პირები რუსული საჯარისო დანაყოფის წარმომადგენლები და ასევე ოსური სპეცრაზმის წევრები არიან.
ადგილზე ასევე ცხინვალის ხელისუფლების ერთ-ერთი წარმომადგენელი რობერტ გაზაევიც მივიდა.
„აქ გადის ე.წ. სამხრეთ ოსეთის სახელმწიფო საზღვარი და იმ შემთხვევაში, თუ გადაადგილებისგან თავს არ შეიკავებთ, შესაბამის ზომებს მივიღებთ", - განუცხადა გაზაევმა.
მისი თქმით, ბოლო დღეების განმავლობაში კონფლიქტის ზონაში განვითარებულ მოვლენებთან დაკავშირებით მსჯელობა ორშაბათს, ერგნეთში ინციდენტების პრევენციის ფორმატში დაგეგმილ რიგგარეშე სხდომაზე შედგება.
