„პოლიციელებმა მიიღეს სათანადო გაფრთხილება, პრემიერმა მოუწოდა, რომ დაიცვან პოლიციელის მუნდირი და ღირსება. იმედია, ბარნოვს ცეცხლს არ გაუხსნიდნენ, მაგრამ... კიკიანთან ძალიან ვაჟკაცები არიან ჩვენი პოლიციელები და ეს ბარნოვი ვინ ყოფილა ასეთი?!
მოქალაქეების დაყოფა არ შეიძლება, კანონი არ უნდა დაირღვეს არც ერთი და არც მეორე თვალსაზრისით. ხელების გადაგრეხვა და სახეში გარტყმა არ არის საჭირო, მაგრამ ასეთი პროვოკაციული ქმედებების აღკვეთა პოლიციას უნდა შეეძლოს", - აცხადებს „მთელ კვირასთან" საუბრისას პარლამენტის ევროპასთან ინტეგრაციის კომიტეტის თავმჯდომარე ლევან ბერძენიშვილი.
დეპუტატს რუსულ-ქართულ ვითარებაზე ვესაუბრეთ, რომელიც ცოტა ხნის წინ კიდევ უფრო გამწვავდა. ამბობს, რომ რუსებმა მოაწყვეს პროვოკაცია, რომელსაც „ნაცმოძრაობა" აჰყვა და ხელისუფლებას ომის დაწყებისკენ მოუწოდა.
ბერძენიშვილი თვლის, რომ ხელისუფლება გონივრულად უნდა მოიქცეს და პროვოკაციებს არ უნდა აჰყვეს. მოუწოდებს ყველას, რომ აქციების ან სხვა აქტივობის დროს ითანამშრომლონ ხელისუფლებასთან, წინააღმდეგ შემთხვევაში, ეს ქართულ სახელმწიფოს დაუჯდება ძვირად.
„გაერთიანებული დემოკრატების" ერთ-ერთი ლიდერის ნინო ბურჯანაძის მოსკოვურ ვიზიტს და ჩამოტანილ გზავნილებსაც ეხმაურება, ამბობს, რომ საქართველოს ელჩები არ სჭირდება. იმ პირობებში კი, როცა რუსეთი უკანდახევას არცერთი თვალსაზრითი არ აპირებს, მასთან პირდაპირი დიალოგი დაუშვებელია.
- უპირველეს ყოვლისა მინდა გითხრათ, რომ ინფორმაცია, რომელსაც ავრცელებენ, ყოველთვის არ შეესაბამება სიმართლეს. ძალიან ხშირ შემთხვევაში არანაირი საზღვრის გადმოწევაზე საუბარი არაა.
თუ ადმინისტრაციულ საზღვრებად განვიხილავთ იმას, რაც მიხეილ სააკაშვილმა დაადგინა, როდესაც სანაკოევის მთავრობა შექმნა, ეს სხვა საკითხია. ე.წ. სამხრეთ ოსეთის წარმომადგენლები ამით სარგებლობენ და იმ ტერიტორიაზე არჭობენ ბანერებს.
საზღვრის პრობლემა საერთოდ არ დგას. პრობლემა დგას იმის, რომ ოსები და რუსები ზაფხულის პროვოკაციებს გვიწყობენ, რომელსაც შესანიშნავად აჰყვნენ ქართველი პროვოკატორები. ეს არის ორმხრივი მუსიკა, რომელიც დაიწერა კრემლში და შესრულებულია ხან მოსკოვიდან, ხან კიევიდან.
- ქართველ პროვოკატორებში ვის გულისხმობთ?
- ქართველ პროვოკატორებს ვეძახი მათ, ვინც ტელევიზიის თანხლებით ემუქრება ქართველ პოლიციელებს, ვინც ითხოვს, რომ ცეცხლი გახსნას ქართულმა მხარემ და ომი დაიწყოს. ომის დაწყება ვისაც უნდა, პროვოკატორია. აბა რა არის?! კარგად ვიცით, ომი რითიც დამთავრდა, ისეთივე შედეგი იქნება, თუ ხელახალი ომი დაიწყება.
ოსეთიდან და რუსეთიდან მოდის პროვოკაცია, ქართველების ნაწილი აყოლილია ამ პროვოკაციას, ნაწილი კი თავად აწყობს მას. ამან იცით, რა გამოიწვია? საერთაშორისო თანამეგობრობა, რომელიც აქამდე ჩვენ გვიცავდა, ახლა ორივე მხარეს მოგვმართავს, რომ თავი შევიკავოთ.
ამიტომ საჭიროა მოქმედება სახელმწიფოსთან შეთანხმებით. არ შეიძლება, რომ ცალკეულმა პირებმა ოპოზიციური ინტერესებით ისარგებლონ. ამ სიტუაციაში პოლიტიკური ქულების დაწერაზე ფიქრი ცეცხლთან თამაშია.
- ჟურნალისტებმაც მოგლიჯეს ბანერი, ესეც პროვოკაციული მოქმედება იყო?
- ჟურნალისტების მოქმედება იყო გულწრფელი, მაგრამ ვინაიდან არ იყო სახელმწიფოსთან შეთანხმებული, ესეც არაგონივრული იყო. მათ რიგებში იყვნენ ნორმალური და გულწრფელი ადამიანებიც და მათ რიგებში იყო ერთი-ორი პროვოკატორიც, მათ შორის შესაძლოა, ერთი-ორი რუსეთის აგენტიც იყოს. ამის გამორიცხვაც არ შეიძლება.
- გამოსავალი რაში მდგომარეობს?
- საერთაშორისო თანამეგობრობის მხარდაჭერაში და ეს მხარდაჭერა საქართველოს ხელისუფლებას აქვს. როგორც კი ეს ფაქტი მოხდა, პრაქტიკულად მაშინვე გააკეთა მკვეთრი განცხადება აშშ-მა, ევროკავშირის უმაღლესმა წარმომადგენელმა ფრედერიკა მოგერინიმ, ასევე ევროსაბჭომ. საგარეო საქმეთა და ევროპის ინტეგრაციის კომიტეტების სხდომაზე მე პირადად გავაკეთე მკვეთრი განცხადება, რასაც 28 ქვეყნის წარმომადგენელი დაეთანხმა.
თუკი საჭიროა რამე აქცია, უნდა შეუთანხმდეს ხელისუფლებას, ასეთ დროს პარტიზანული მოქმედებები დაუშვებელია. ეს არის რუსული პროვოკაცია, რა დროსაც ყველანი უნდა ვიყოთ ერთად, ვიმოქმედოთ ერთად და გადაწყვეტილებებიც ერთად უნდა მივიღოთ. ომის პროვოცირება რომელიმე მხრიდან არავითარ შემხთვევაში არ უნდა დავუშვათ. უცნაურია, რომ ამას საქართველოში ახსნა სჭირდება.
საქართველოს შიდა საზღვარი არ აქვს. აფხაზეთი და ოსეთიც საქართველოა! საუბარია საოკუპაციო ზოლზე, რომელიც უმეტეს შემთხვევაში გადმოწეულიც არ არის. საუბრობენ, რომ ნავთობსადენის მილის ოკუპაცია მოხდა, რაც ასე არ არის. ამის შესახებ ჰკითხეთ „ბიპის".
- თუმცა ის შემაშფოთებელი ფაქტია, როდესაც ცხვირწინ ბანერებს გვიდგამენ...
- რა თქმა უნდა, შემაშფოთებელია და უნდა შევშფოთდეთ, მაგრამ ომი არ უნდა დავიწყოთ. ახლა თუ რამე ქმედებებს დავიწყებთ, ამით დავადასტურებთ ე.წ. სამხრეთ ოსეთის დამოუკიდებლობას, მაშინ როდესაც ის თვითაღიარებულია და არ არის აღიარებული საერთაშორისო თანამეგობრობის მიერ. მხოლოდ რუსეთს და მსოფლიოს რამდენიმე არასერიოზულ სახელმწიფოს აქვს აღიარებული.
ყველამ უნდა ვიცოდეთ, რომ ასეთი პროვოკაციები კიდევ იქნება, ამიტომ ერთად უნდა ვიმოქმედოთ. არ შეიძლება, რომ იმ კაცის ბიბლიოთეკის გამგე, რომელსაც ცხოვრებაში ერთი წიგნი არ წაუკითხავს, საქართველოს პატრიოტიზმს ასწავლიდეს. რა გაუკეთებია ანდრო ბარნოვს ისეთი ქვეყნისთვის, რომ მაგან წამოიწყოს ომი და მაგის პროვოკაციაზე წამოვეგოთ?!
- ბარნოვის საქციელს არავითარი რეაგირება არ მოჰყოლია პოლიციელების მხრიდან...
- გეთანხმებით, რომ პოლიციელი უნდა მოქმედებდეს კანონის მიხედვით. ჩვენ ვიცით პოლიცია ვის როგორ ექცევა. ხან ვეხვეწებით რომ ცუდად ნუ ექცევიან მოქალაქეებს და ხან ვეხვეწებით, რომ პოლიციის მუნდირი დაიცვან. ვფიქრობ, რომ იგი უნდა მოქცეულიყო კანონის შესაბამისად. კანონი რასაც გულისხმობს, მე მგონი, ყველანი ვხვდებით.
სხვათა შორის ის პოლიციელი ბარნოვისგან განსხვავებით აგვისტოს ომის მონაწილეა, შესაძლოა სწორედ ამიტომ არ დაიცვა პოლიციის მუნდირი, მაგრამ მომავალში ეს ასე ვეღარ მოხდება. შეუძლებელია რომ ვინმე, ვინც უნდა იყოს ის, პოლიციელს აგინებდეს, თან ტელევიზიის თანდასწრებით. ეს არის მათხოვრული საქციელი.
ვაჟკაცები ასე არ იქცევიან. თუ მაგარი ბიჭია, აგერ არის ოსეთის პოლიციაც და რუსეთისაც, მასთან მისულიყო. ეს არის პატრიოტიზმი?! მესმის, რომ „რუსთავი 2"-თვის „ნაცმოძრაობა" უფრო მნიშვნელოვანია, ვიდრე საქართველო, მაგრამ მე და თქვენ ხომ ვხედავთ, რომ საქმე სხვაგვარადაა.
პოლიციელებმა მიიღეს სათანადო გაფრთხილება, პრემიერმა მოუწოდა, რომ დაიცვან პოლიციელის მუნდირი და ღირსება. იმედია ბარნოვს ცეცხლს არ გაუხსნიდა, მაგრამ... კიკიანთან ძალიან ვაჟკაცები არიან ჩვენი პოლიციელები და ეს ბარნოვი ვინ ყოფილა ასეთი?!
მოქალაქეების დაყოფა არ შეიძლება, კანონი არ უნდა დაირღვეს არცერთი და არც მეორე თვალსაზრისით. ხელების გადაგრეხვა და სახეში გარტყმა არ არის საჭირო, მაგრამ ასეთი პროვოკაციული ქმედებების აღკვეთა პოლიციას უნდა შეეძლოს.
„რუსთავი 2"-მა დადგა შოუ, რომ როგორ მე არიოს ვითარება და სააკაშვილი ქვეყანაში დაბრუნდეს, თან შეთავსებით უკრაინაშიც იყოს და აქაც. „რუსთავი 2"-ის შეშურდა მეორე უფრო პატარა ტელევიზიას და ახლა ისინი ატარებენ კონცერტს (ინტერვიუ ჩაწერილია შაბათს „ტაბულას" მიერ ორგანიზებულ აქციამდე 3 საათით ადრე - ავტ.).
- რომელ ტელევიზიას გულისხმობთ?
- თამარ ჩერგოლეიშვილის „ტაბულას" ვგულისხმობ, რომლებიც ახლა თავად აპირებენ შოუს დადგმას. რახან ბარნოვის ფრთამ გაბედა, ახლა ბოკერიას ფრთამაც უნდა გაბედოს.
- საერთაშორისო ბერკეტები სრულად არის ამოქმედებული? საგარეო საქმეთა მინისტრის ყოფილი მოადგილე აცხადებს, რომ როდესაც მავთულხლართებს გვიბამდნენ რუსები, მაშინ თავად უფრო აქტიურები იყვნენ...
- ბატონი დავითი მაშინ ხელისუფლებაში იყო და ახლა ოპოზიციაშია. მეტი არაფერი არ შეცვლილა. მთავრობა ზუსტად ისე მოქმედებს, როგორც მაშინ. ეს სავსებით გასაგებია. განსხვავება ისაა ზალკალიანსა და ბარნოვს შორის, რომ ზალკალიანი ომისკენ არ მოგვიწოდებს.
რაც შეეხება მოქმედებებს, ვიმეორებ აშშ-მა მეორე დღესვე გააკეთა განცხადება. თქვენც იცით, მეც და ზალკალიანმაც, რომ ეს ასე არ ხდება ხოლმე. ჩვენი ელჩი იმ წუთშივე მივარდა აშშ-ს შესაბამის ორგანოებთან და აუხსნა საკითხის სიმწვავე და შესაბამისად იქიდან განცხადება გაკეთდა.
რუსეთი იმდენად ცუდად იქცევა უკრაინაში, მოახდინა ტერიტორიის ანექსია. აღმოსავლეთ უკრაინაში საშინელებები ხდება, ამ ფონზე საქართველოში ბანერის დარჭობა შეიძლება წვრილმანად ჩანდეს, მაგრამ ჩვენ მაინც მოვახერხეთ რომ დამგმობი განცხადებები გაკეთებულიყო.
- ნინო ბურჯანაძის მოსკოვურ ვიზიტს როგორ შეაფასებთ? პარლამენტის ექსსპიკერი აცხადებს, რომ რუსეთი მზადაა საქართველოს თუნდაც ყველაზე მწვავე საკითხებზე ელაპარაკოს...
- ნინო ბურჯანაძემ უნდა იცოდეს, რომ საგარეო პოლიტიკა არის ხელისუფლების ხელში. არცერთ ქვეყანას არ ექნება წარმატება, თუკი საგარეო პოლიტიკის ბერკეტები ოპოზიციის ხელშია.
ხელისუფლება რუსეთს არ უნდა დაელაპარაკოს, ბურჯანაძე მოსკოვში წავა თუ სადაც უნდა, ეს ჩემი საქმე არ არის. მაგრამ ის, რომ ბურჯანაძე ელჩი იყოს მოსკოვსა და თბილისს შორის, ეს წარმოუდგენელიცაა და დაუშვებელიც. შუამავლები არ გვჭირდება. ვისაც ჩათვლის ხელისუფლება საჭიროდ და როცა ჩათვლის, იმას დაელაპარაკება.
ბურჯანაძეს ქულების დაწერა უნდა ამით, რომ რაღაცა დამაბარა რუსეთის ხელისუფლებამ და არიქა უნდა შევხვდე საქართველოს ხელისუფლებას და დანაბარები უნდა გადავცეო. ბურჯანაძეს უნდა პრორუსი იყოს, თუ უნდა პროამერიკელი, ან ორივე ერთად.
- ხომ არ დადგა დრო რომ დაიწყოს მზადება ქვეყნების პირველი პირების შეხვედრისთვის?
- მე მგონი ეს დრო ჯერ არ დამდგარა იმ უბრალო მიზეზის გამო, რომ რუსეთი უკან არ იხევს არცერთი თავისი დანაშაულისა თუ შეცდომისგან. არც ჩვენი ტერიტორიების დეოკუპაციას ახდენს, არც ე.წ. აფხაზეთისა და ოსეთის აღიარების უკან წაღებას აპირებს და არც პროვოკაციებს დაანება თავი. ასეთ დროს რაზე უნდა მოველაპარაკოთ ძნელი სათქმელია.
სხვა მხრიდან რუსეთთან დალაპარაკება ხდება, დალაპარაკება და არა მოლაპარაკება, იმაზე თუ რა კულტურული ღონისძიება იქნება, ამაზე შეხვედრები გაიმართება. ამისთვის ბურჯანაძე არ გვჭირდება, გვაქვს აბაშიძე-კარასინის ფორმატი. ამას გარდა ჩვენი ტერიტორიების საკითხზე მოლაპარაკებები გვაქვს ჟენევაში. ეს სრულიად საკმარისია.
ჩვენ რუსეთთან დიპლომატიური ურთიერთობის აღდგენაზე არ ვართ თანახმა იმ პირობებში, როდესაც მას ტერიტორიების 20 % ოკუპირებული აქვს. ბურჯანაძე, როგორც ჩანს, თანახმაა, ჩვენ - არა. ქართველ ხალხს თუ მოუნდება რომ აირჩიოს ბურჯანაძე, კი ბატონო ასე მოიქცეს და დატოვოს მხოლოდ თბილისი, დანარჩენი ჩააბაროს მტერს.
ბურჯანაძის ჩანაფიქრი მარტივია, წაიყვანოს ხელისუფლება უპერსპექტივო მოლაპარაკებაზე, რომელიც ჩაფლავდება და ამის ხარჯზე მისმა პარტიამ არჩევნები მოიგოს. რატომ ჰგონია მას ხელისუფლება ასეთი პრიმიტიული, რომ ორჯერ ორი რომ ოთხია, ამ დონეზეც არ იცის არაფერი?!
რამე სპეციფიკური განსხვავება ჩვენსა და ბურჯანაძეს შორის ინტელექტში მე ვერ შევამჩნიე. თუ შევამჩნიე იმ მიმართულებით არა, როგორც ეს ქალბატონ ბურჯანაძეს ჰგონია.
იაგო ნაცვლიშვილი
„რეზონანსი"
