მოყვარულ სტუდენტურ თეატრთა ასოციაცია „Asta“-ს მიერ გამართულ ფესტივალში - „ნიღაბი 2014"-ში გამარჯვებული სტუდენტები 17-დან 25 აგვისტოს ჩათვლით შვედეთში გაემგზავრებიან. მოყვარულ სტუდენტთა ასოციაცია „Asta" შვედეთის სახალხო თეატრთან ერთად ახორციელებს პროექტს, რომელიც გულისხმობს ორი ქვეყნის იმ სტუდენტთა დამეგობრებას, რომლებსაც თეატრის სიყვარული აერთიანებთ.
„17 აგვისტოდან 25 აგვისტომდე ჩვენი მოყვარული მსახიობი სტუდენტები შვედეთში გაემგზავრებიან, ხოლო შვედი მსახიობი სტუდენტები ჩამოვლენ საქართველოში მომავალ წელს. იქნება თეატრალური „ვორქ-შოფები“. ვისაუბრებთ, თუ რა პრობლემები არსებობს თეატრის კუთხით საქართველოში, რას შეცვლიან სტუდენტები. ისინი მოგვითხრობენ თავიანთი ქვეყნის თეატრალურ ცხოვრებაზე და ა.შ.", - განუცხადა „რეპორტიორს" თბილისის სახელმწიფო სამედიცინო უნივერსიტეტის პროფესორმა ნათია გუჯაბიძემ.
„ნიღაბი 2014" 2014 წლის 2-დან 10 დეკემბრის ჩათვლით მიმდინარეობდა. კომპეტენტურმა ჟიურიმ, რომლის შემადგენლობაში შედიოდნენ გოგი თოდაძე, კახა მიქიაშვილი, გოჩა კაპანაძე, გოჩა წულუკიძე, ნანული სარაჯიშვილი, სოფიო სიხარულიძე და ია სუხიტაშვილი, სხვადასხვა ნომინაციაში გამარჯვებულები გამოავლინა. ფესტივალში საქართველოს, უკრაინის, თურქეთის და რამდენიმე აზიური ქვეყნის თეატრალური დასები მონაწილეობდნენ.
