ბევრი ჩვენგანი გამუდმებით დებს ბავშვის ფოტოებს სოციალურ ქსელში. თუმცა ზოგიერთი ფოტოების განთავსების დროს არ უთითებს, რომ მისი ნახვა მხოლოდ მეგობრებს შეუძლიათ, პოსტები საჯარო ხდება და ნახვა შეუძლია ყველას, ვისაც მოესურვება, ნაცნობსა და უცნობს. ამას კი ყოველთვის როდი მოსდევს კარგი შედეგები.
ბოლო პერიოდში სოციალურ ქსელში ახალი უსიამოვნო მოდა დამკვიდრდა - "ციფრული კიდნეპინგი". ზოგიერთი მომხმარებელი იპარავს ბავშვების ფოტოებს სხვა მომხმარებლების გვერდებიდან და თავის ექაუნთებზე ათავსებს. უფრო ხშირად ამით ახალგაზრდა უშვილო ქალები არიან დაკავებული, რომლებიც ერთმანეთს უზიარებენ სოციალურ ქსელში ნაპოვნ "საყვარელ სიფათებს". ეს უაზრო თამაშია, მართალია, უსაფრთხო, მაგრამ ამ ბავშვების მშობლებისთვის არც ისე სასიამოვნო.
თუმცა "ციფრული კიდნეპინგი" მხოლოდ ამით როდი შემოიფარგლება. ამაში მამაკაცები და ქალები არიან ჩართული, რომლებიც ბავშვების ფოტოებს თავიანთ ექაუნთზე ისე დებენ, თითქოს მათი საკუთარი შვილები არიან. რა მიზანი ამოძრავებთ, ეს გაუგებარია.
წარმოიდგინეთ, რა დაემართებოდა ამერიკელ დანიკა პატერსონს, როცა ცოტა ხნის წინ ვიღაც უცნობ მამაკაცთან გვერდზე იპოვა თავისი 4 წლის გოგონას ფოტოები - ის კაცი ამტკიცებდა, რომ თავისი შვილის ფოტოებს დებდა. ფოტოებს საკმაოდ
ინტიმური მინაწერებიც ამშვენებდა, მაგალითად: "ეს ჩემი ქალური ვერსიაა", ან "ჩემი ქალიშვილი ყველა ბიჭს გადარევს". დანიკამ ეს ყველაფერი მაშინ აღმოაჩინა, როცა უცნობი მამაკაცის ფეისბუქის გვერდის შესახებ მეგობარმა ამცნო.
ადრე ანალოგიური სიტუაცია ჰქონდა ლინდსი პერისს. მისი წლი-ნახევრის ვაჟის ფოტოები სრულიად უცნობმა ახალგაზრდა გოგონამ "მიითვისა" - ამტკიცებდა, რომ ეს მისი შვილი იყო. "შიშისგან გავქვავდი. პანიკაში ჩავვარდი და არც კი ვიცოდი, რა მექნა", - აღიარებდა ლინდსი. მერე პირდაპირ მისწერა იმ გოგონას, მანაც ბოდიში მოუხადა და სასწრაფოდ წაშალა ფოტოები.
დანიკას ნაკლებ გაუმართლა. მისმა მიმართვებმა მამაკაცისადმი, რომელმაც მისი ქალიშვილი "იშვილა", არანაირი შედეგი არ გამოიღო. არც ფეისბუქის ადმინისტრაცია დაეხმარა მოპარული ფოტოების წაშლაში და ახლა სასამართლოთი უნდა დაამტკიცოს, რომ ის ფოტოები მართლა თავის შვილს ეკუთვნის და არა იმ კაცისას. მხოლოდ ამის მერე აიძულებს მამაკაცს, მისი ქალიშვილის ფოტოები წაშალოს.
ასე რომ, თუ იმასაც გავითვალისწინებთ, რომ ბავშვების (განსაკუთრებით, გულახდილ და შიშველ ფოტოებს) ათასგვარი გადახრილი აზრების მქონე ადამიანებიც იყენებენ ხოლმე (იხილეთ სტატია), ასჯერ და ათასჯერ უნდა დავფიქრდეთ, სანამ ამა თუ იმ ფოტოს გავავრცელებთ სოციალური ქსელით და ასევე აუცილებლად მივუთითოთ ბავშვების ფოტოებს, რომ ის მხოლოდ მეგობრებმა უნდა ნახონ.
წყარო: mshoblebi.ge
