კულტურისა და ძეგლთა დაცვის მინისტრის მიხეილ გიორგაძის განცხადებით, 2016 წლის 31 დეკემბრამდე, მცხეთაში ნებისმიერი სახის მშენებლობასა და პრივატიზაციაზე მორატორიუმი ცხადდება. „მცხეთის კულტურული მემკვიდრეობის დამცავ ზონებში ქალაქთმშენებლობის რეგულირების განსაკუთრებული რეჟიმის ამოქმედების შესახებ" დადგენილებას მთავრობის დღევანდელ სხდომაზე განიხილავენ.
„დადგენილება გულისხმობს მორატორიუმის შემოღებას მცხეთაში ყველანაირ მშენებლობაზე, პრივატიზაციაზე, გასხვისებაზე. ეს მოთხოვნა იუნესკო-მ და მსოფლიო მემკვიდრეობის ცენტრმა წამოაყენეს, რათა მიწათმოქმედების და ქალაქგანვითარების გენერალური გეგმები დამთავრდეს, იუნეკო-სთან შეთანხმდეს და თუ ამ ნაბიჯებს გადავდგამთ, მომავალ წელს პრაქტიკულად გარანტირებული გვაქვს მცხეთის მსოფლიო მემკვიდრეობის ნუსხაში დაბრუნება", - განაცხადა მიხეილ გიორგაძემ.
გიორგაძის თქმით, მორატორიუმი, ქალაქის გარდა, მის შემოგარენს, ლანდშაფტური დაცვის ზონებსაც შეეხება.
