ხარაგაულის გამგებელი კობა ლურსმანაშვილი სოციალურ ქსელში პოსტს აქვეყნებს, სადაც ჟურნალისტ ირაკლი შონიას საზოგადოების შეცდომაში შეყვანის გამო ბოდიშის მოხდას სთხოვს.
„მერაბ კოსტავას მემორიალური სკვერი (მათ შორის მემორიალური დაფა) სრულად შეესაბამება ჟურნალისტ ნინო მიქიაშვილის მიერ გავრცელებულ ფოტომასალას, რომელიც მიმდინარე წლის 26 მაისის ღონისძიებებს ასახავს სოფელ ბორითში.
ჟურნალისტ ირაკლი შონიას მოვუწოდებ, პირადად ჩაბრძანდეს სოფელ ბორითში და მოინახულოს მერაბ კოსტავას სახელობის სკვერი. გარდა ამისა, საზოგადოებას ბოდიში მოუხადოს შეცდომაში შეყვანის გამო!
ჟურნალისტ ირაკლი შონიას მიერ გამოქვეყნებული ფოტო ასახავს მერაბ კოსტავას ძველი მემორიალური დაფის მდგომარეობას რამდენიმე ავტოავარიის შედეგად დარჩენილს.
სწორედ აღნიშნული მრავალჯერადი ფაქტის გამო, დაინტერესებულ მხარეებთან შეთანხმებით, ადგილობრივმა თვითმმართველობამ მოახდინა ახალი სკვერის და მემორიალური დაფის მოწყობა, რომელიც სწორედ ისე გამოიყურება დღესაც,როგორც 26 მაისს გახლდათ და კიდევ უფრო მეტად გალამაზდება. გარდა ამისა, მომავალ წელს აღნიშნულ სკვერში იგეგმება მერაბ კოსტავას ბიუსტის გახსნა .
ხარაგაული და ხარაგაულელები ყოველთვის უდიდეს პატივს მიაგებდნენ და მიაგებენ საქართველოს ეროვნულ გმირს , ბატონ მერაბ კოსტავას!" - წერს კობა ლურსმანაშვილი.
