პარლამენტარი ელისო ჩაფიძე მიიჩნევს, რომ პრემიერმა შს და სასჯელაღსრულების მინისტრებად გიორგი მღებრიშვილისა და კახა კახიშვილის დანიშვნით საუკეთესო გადაწყვეტილება მიიღო. ელისო ჩაფიძე „რეპორტიორთან" საუბარში გიორგი მღებრიშვილისა და კახა კახიშვილის კანდიდატურებს დადებითად აფასებს და იმედოვნებს, რომ მათი საქმიანობა წარმატებული იქნება.
„პრემიერმა მიიღო საუკეთესო გადაწყვეტილება. ერთი მხრივ, ბატონი მღებრიშვილის დანიშვნა შსს-ში ნიშნავს იმას, რომ გაგრძელდება ის რეფორმები, რომლის შესრულების ვალდებულებაც აიღო „ქართულმა ოცნებამ" თავის დროზე. გიორგი მღებრიშვილი თავისი საქმის პროფესიონალია და დარწმუნებული ვარ, მისი სახით ღირსეული შემცვლელი გამოუჩნდა ბატონ ვახტანგ გომელაურს, რომლის მოღვაწეობითაც ჩვენ ძალიან კმაყოფილები ვართ.
რაც შეეხება კახა კახიშვილს. როგორც პრემიერმა აღნიშნა, ძალიან მნშვნელოვანია, რომ ის გახლდათ არასამთავრობო სექტორის წარმომადგენელი. მას საჯარო სამსახურში გადანაცვლების შემდეგაც არ გაუწყვეტია კონტაქტი არასამთავრობო სტრუქტურებთან. ჩვენთან, პარლამენტის წევრებთან თანამშრომლობდა როგორც ძალიან გახსნილი, კომპეტენტური ადამიანის უფლებების დაცვის კუთხით. მივესალმები ამ დანიშვნას და ვფიქრობ, რომ ურთიერთობა პარლამენტსა და ამ ორ სამინისტროს შორის, ასევე მოსახლეობასთან, იქნება საუკეთესო მათი მხრიდან", - განაცხადა ელისო ჩაფიძემ.
