ანალიტიკოსი არჩილ გამზარდია სასჯელაღსრულების სისტემაში განხორციელებულ საკადრო პოლიტიკას ლოგიკურ პროცესს უწოდებს. მისი თქმით, კახა კახიშვილს მინისტრის თანამდებობაზე დანიშვნით უფლებამოსილებათა სივრცის არეალი ეზრდება, შესაბამისად მისი საქმიანობა უფრო ეფექტური იქნება. ხოლო მღებრიშვილს, იმდენად მნიშვნელოვანი სამინისტროს მმართველობა ჩაბარდა, არ გაუჭირდება მისი წარმატებით გაძღოლა. გამზარდია განცხადებას „რეპორტიორთან" საუბარში აკეთებს.
„ბატონი კახა კახიშვილი დიდი ხანია დადებითი იმიჯით სარგებლობს, იგი ძალიან საინტერესო ადამიანია და ვფიქრობ, რომ ეფექტურად წარუძღვება თავის საქმიანობას. ამ შემთხვევაში მას უფლებამოსილებათა სივრცე ეზრდება.
გიორგი მღებრიშვილის შეფასებაში კვალიფიციური ვერ ვიქნები, თუმცა ვფიქრობ, რომ ვახტანგ გომელაურმა თავის მოადგილეებთან ერთად შექმნა ეფექტური სამინისტრო, სავარაუდოდ, ამ ფონზე ახალი მინისტრი კარგად და წარმატებულად წარუძღვება საქმიანობას. საქმე საკმაოდ ლოგიკურ პროცესთან გვაქვს",-აცხადებს არჩილ გამზარდია.
