ადიგენში საქართველოს მთლიანობისთვის დაღუპულ გმირთა მემორიალი გაიხსნა
საქართველოს მთლიანობისთვის დაღუპულ გმირთა მემორიალი ადიგენში დღეს, 8 აგვისტოს, გაიხსნა. მემორიალზე 17 გმირს შორის, 2008 წლის რუსეთ- საქართველოს ომში დაღუპული სამი მებრძოლის- დევი ჩადუნელის, ალექსანდრე ზაზაშვილისა და არტემ ბალახაშვილის სახელებია ამოტვიფრული.
ღონისძიებას დაღუპულების მშობლები, ნათესავები და თანასოფლელები, ადიგენის მუნიციპალიტეტის გამგეობისა და ვეტერანთა საქმეების დეპარტამენტის სამცხე-ჯავახეთის რეგიონულისამმართველოს წარმომადგენლები ესწრებოდნენ. მემორიალი ყვავილებით შეამკეს და კიდევ ერთხელ გაიხსენეს დაღუპული გმირები. გაიმართა გარდაცვლილთა სულების მოსახსენიებელი პანაშვიდი.
რუსეთ- საქართველოს ომში გარდაცვლილი სამივე გმირის სახელი მინიჭებული აქვს დაბა ადიგენში ქუჩებს. ყოველწლიურად მუნიციპალიტეტი გარდაცვლილების ოჯახებს მატერიალურად ეხმარება.
ასევე, ტარდება არტემ ბალახაშვილის სახელობის ტურნირი მინი ფეხბურთში, რომელშიც მონაწილეობას მუნიციპალიტეტის საჯარო სკოლები იღებენ.
დღესვე, ასპინძის მუნიციპალიტეტის, სოფელ მირაშხანში აგვისტოს ომში დაღუპული ტარიელ ქამაშაძეც გაიხსენეს. მისი სახელობის წყაროსთან შეიკრიბნენ მუნიციპალიტეტის პირველი პირები და გარდაცვლილის ახლობლები.
(მოაზამზადა თეონა რამაზაშვილმა)
