საქართველო რუსეთის კონტრსანქციაში არ მოხვდა: „ამ დროისთვის რუსეთსა და საქართველოს არ გააჩნიათ აქტიური ურთიერთობა და დიდი საქონელბრუნვა; სხვა ქვეყნებისგან განსხვავებით, საქართველოს ხელისუფლებისგან მიღებული ზომები რუსეთთან მიმართებაში, უმნიშვნელოა", - ნათქვამია რუსეთის მინისტრთა კაბინეტის განცხადებაში.
აღნიშნულს აფასებს ფინანსთა მინისტრი ნოდარ ხადური. მას მიაჩნია, რომ მთავრობის და მისი ხელმძღვანელის დამსახურებაა, რომ საქართველოს აქვს შესაძლებლობა, ერთნაირად წარმატებით იმუშაოს ყველა ბაზარზე. ასევე, დარჩეს იმ ბაზრებზე, სადაც ქართული პროდუქციის ცნობადობა ძალიან მაღალია:
"ჩვენ არ გვაქვს იმის ფუფუნება და ბედნიერება, რომ ვარჩიოთ ბაზრები სად ვიმუშაოთ და სად არა. ყველა შესაძლებლობა უნდა გამოიყენოს საქართველომ, ცხადია, რომ რუსეთის და ყოფილი საბჭოთა კავშირის სხვა ქვეყნების ბაზრები არის ერთ-ერთი საინტერესო ამ თვალსაზრისით", - განმარტა ნოდარ ხადურმა.
