საქართველოს პარლამენტის წევრი დათო ლორთქიფანიძე ფეხბურთის ფედერაციის უკვე ყოფილ პრეზიდენტს - ზვიად სიჭინავას მიმართავს. როგორც ლორთქიფანიძემ „რეპორტიორს" განუცხადა, ზვიად სიჭინავამ არ უნდა გამოიყენოს მის ხელთ არსებული ბერკეტი, ფედერაციის პრეზიდენტის არჩევნებისთვის ყრილობის დანიშვნის თარიღზე. მისი განცხადებით, საჭიროა უმოკლეს ვადაში დაინიშნოს ყრილობის თარიღი:

„ფეხბურთის ფედერაციის პრეზიდენტმა სუპერთასის მატჩის შემდეგ განაცხადა, რომ ის აღარ იყრიდა კენჭს ფედერაციის პრეზიდენტობაზე. მთელი ამ დროის განმავლობაში არის მოლოდინი, რომ ის დანიშნავს ფეხბურთის ფედერაციის ყრილობას მოკლე ვადაში. ყველა ფიქრობს, რომ 40 დღის ვადაში დაინიშნება, ასე აშუქებს მასმედია და ასე საუბრობს ფედერაციის მენეჯმენტიც. მე კი დარწმუნებული ვარ, ყრილობა 40 დღეში არ დაინიშნება. 40 დღე არის მინიმალური პერიოდი, როცა უნდა ეცნობოს ყრილობის დანიშვნის ვადის შესახებ იმ ადამიანებს, ვინც იღებს ყრილობაში მონაწილეობას.

ვფიქრობ, სიჭინავა გამოიყენებს თავის ვადას, ის ყრილობას არა 40 დღეში, არამედ წლის ბოლოს დანიშნავს. მეტიც, შესაძლოა წლის ბოლოსაც არ დანიშნოს და ვადა კიდევ გადასწიოს!

არ მგონია, კაცმა, რომელმაც 2015 წლის 22 იანვას ამოწურა თავისი საპრეზიდენტო ვადა და ამ დრომდე აგრძელებდა ფედერაციის პრეზიდენტის პოსტზე მუშაობას, რა თქმა უნდა ის უცებ არ მიიღებს გადაწყვეტილებას და არ დანიშნავს ყრილობის თარიღს.

ის ამ დრომდე აგრძელებს ამ თანამდებობაზე ყოფნას, რადგან არის მოვალეობის შემსრულებელი და ბოლომდეც გამოიყენებს ამ პოსტს.

მოვუწოდებ ზვიად სიჭინავას, როგორც საქართველოს პარლამენტის წევრი, როგორც ფეხბურთის გულშემატკივარი, მიიღოს გადაწყვეტილება და ფეხბურთის ფედერაციის ყრილობა დანიშნოს მოკლე ვადაში. არ გამოიყენოს მათ ხელთ არსებული ბერკეტები და ყრილობის ვადა არ გადაწიონ განუსაზღვრელი დროით!", - განაცხადა ლორთქიფანიძემ.