ბათუმის კორტებზე რუსული შანსონის შემსრულებლის მიხეილ შუფუტინსკის კონცერტი გაიმართა. მომღერალი მაყურებლის წინაშე 45 წუთიანი პროგრამით წარსდგა და ძირითადად, სიმღერები ახალი ალბომიდან შეასრულა.
კონცერტის დაწყებამდე მიხეილ შუფუტინსკიმ ჟურნალისტებს განუცხადა, რომ ის ბათუმში პირველადაა და მოხარულია, რომ საქართველოში კონცერტის ჩასატარებლად ჩამოვიდა.
„ცოტას ვღელავ, იმიტომ რომ არასდროს ვყოფილვარ ბათუმში. მე მეგონა, რომ ვიყავი აქ ნამყოფი, მაგრამ ეს იყო ძალიან დიდი ხნის წინ - სანამ წავიდოდი ამერიკაში მე ვიმყოფებოდი სოხუმში. დღეს იქნება კონცერტი, რაც ჩემთვის ძალიან სასიამოვნოა. ველოდები როდის გავალ სცენაზე და ვიმღერებ თქვენთვის," - აღნიშნა მიხეილ შუფუტინსკიმ.
მიხეილ შუფუტინსკიმ რუსეთის მიერ საქართველოს ოკუპაციის თაობაზე დასმულ შეკითხვაზე განმარტება გააკეთა. მისი თქმით, პოლიტიკა უნდა აკეთონ პოლიტიკოსებმა.
„გეტყვით, რომ მე ვმღერი სიმღერებს და პოლიტიკით უნდა იყოს დაკავებული ის ხალხი ვინც აკეთებს პოლიტიკას. ჩემი პოლიტიკაა ის კარგი სიტყვები და ის სიმღერები, რომელსაც მე ვმღერი ჩემი მაყურებლისთვის" - განაცხადა მიხეილ შუფუტინსკიმ.
