რევაზ არველაძე დღევანდელი მდგომარეობით, დაბრკოლებების გარეშე უნდა გახდეს საქართველოს ფეხბურთის ფედერაციის პრეზიდენტი. ფედერაციის საარჩევნო სუბიექტების ხმათა დიდი ნაწილი მას უკვე დაბევებული აქვს.
არველაძის მომხრეთა შორისაა ფეხბურთის რეგიონული ფედერაციები, რომლებმაც სფფ-ის მოქმედი გენერალური მდივნისადმი მხარდაჭერა საჯაროდ დააფიქსირეს.
თუმცა როგორც ჩანს, არველაძე მათ ბოლომდე მაინც არ ენდობა. ამის დასტურია ფედერაციაში მისული წერილები, სადაც ირკვევა, რომ იმერეთის ფედერაცია საკუთარ საარჩევნო ხმას ოთარ კორღალიძეს გადასცემს, ხოლო გურიისა - გოჩა ტყებუჩავას.
ცნობისთვის, ორივე მათგანი რევაზ არველაძის ახლო მეგობარი და ფეხბურთის ფედერაციის მოქმედი თანამშრომელია. კიდევ ერთი სიახლე ისაა, რომ ერთ-ერთმა საარჩევნო სუბიექტმა, ბავშვთა საარჩევნო სკოლების გაერთიანებმა საკუთარი ხმა რევაზ არველაძის ძმას, არჩილ არველაძეს „აჩუქა".
იმერეთის ფეხბურთის ფედერაციის პრეზიდენტმა ვალერი მანაგაძემ კი მოქმედ გენსეკს საკუთარი მხარდაჭერა „იმედის" საინფორმაციო პროგრამა „ქრონიკაშიც" დაუფიქსირა.
„რევაზ არველაძეს ჩემგან ხმა უკვე მიღებული აქვს. მე ხომ მისი თანამშრომელი ვარ და არასწორად მოვიქცევი, თუ სხვაგვარ არჩევანს გავაკეთებ. რატომ უნდა თქვან ჩემმა შვილიშვილებმა, რომ მოღალატე ბაბუა ჰყავდათ", - განაცხადა მანაგაძემ, რომელიც არველაძემ სხვა რეგიონების საფეხბურთო თავკაცებთან ერთად მაისში ვარშავაში, ევროპის ლიგის ფინალზე დასაწრებად წაიყვანა.
