ტელეკომპანია "იმედმა" საზოგადოებრივ-პოლიტიკური გადაცემები და თოქ-შოუები დახურა.
როგორც „შალვა რამიშვილის შოუს" ავტორმა და წამყვანმა, შალვა რამიშვილმა „პრაიმტაიმნიუსს" განუცხადა, მისი გადაცემა გასართობია და ტელეკომპანიის გადაწყვეტილება მას არ ეხება. რამიშვილის ცნობითვე, ორშაბათს, "იმედში" თათბირია დაგეგმილი, სადაც გაირკვევა, თუ რა გახდა გადაწყვეტილების მიღების მიზეზი.
შალვა რამიშვილი:
„კი, ვნახე ეს განცხადება. განცხადებაში ნათქვამია, რომ საზოგადოებრივ-პოლიტიკური თოქ-შოუები იხურება და არა გასართობი. ჩემი გადაცემა, "შალვა რამიშვილის შოუ" არ არის საზოგადოებრივ-პოლიტიკური თოქ-შოუ. ეს განცხადება კი ეხება პოლიტიკურ გადაცემებს."
- რა გახდა გადაწყვეტილების მიღების მიზეზი?
- მე შვებულებაში ვარ, გავიგებ და ვნახავ. ორშაბათს, როგორც ვიცი თათბირია.
ტელეკომპანია "იმედმა" საზოგადოებრივ-პოლიტიკური თოქ-შოუების დახურვის გადაწყვეტილება ცოტა ხნის წინ მიიღო. როგორც ტელეკომპანიის მიერ გავრცელებული განცხადებიდან ირკვევა, არხზე არსებული გადაცემების ფორმატის შეცვლა, თვისობრივად ახალი სატელევიზიო პროდუქტის შექმნის გამო განხორციელდა.
