ვეტერანი ფეხბურთელი ლევან კობიაშვილი ფეხბურთის ფედერაციის საპრეზიდენტო არჩევნებში ოფიციალურად დღეს დარეგისტრირდა. ფედერაციასთან კი კობიაშვილის მხარდამჭერი აქცია გაიმართა. გულშემატკივრები როგორც თბილისიდან, ისე სხვადასხვა რეგიონებიდან შეიკრიბნენ. მათი განცხადებით, საჭიროა ძირეული ცვლილებები ფეხბურთში, ამიტომ კობიაშვილს სრულ მხარდაჭერას უცხადებენ.
კობიაშვილის კანდიდატურა „დინამო თბილისმა" წარადგინა. ლევან კობიაშვილის თქმით, მისთვის ერთ-ერთი პრიორიტეტული მიმართულება ეროვნული ჩემპიონატის განვითარება იქნება.
„ოფიციალურად ვარ კანდიდატი, რაც მახარებს. მინდა დინამო თბილისს მადლობა გადავუხადო ნდობისთვის, მხარდაჭერისთვის. მადლობას ვუხდი ყველა იმ ადამიანს, ვინც ნდობით მიყურებს.
არჩევნებამდე დარჩენილ პერიოდს მაქსიმალურად ნაყოფიერად გამოვიყენებ, შევხვდები კლუბებს, რეგიონულ ფედერაციებს, ფედერაციის ყველა სუბიექტს.
არჩევნები უნდა ჩატარდეს დემოკრატიულ გარემოში, სახელმწიფოს ყოველგვარი ჩარევის გარეშე, დარწმუნებული ვარ, ასეც იქნება. ოპტიმისტურად ვარ განწყობილი და მჯერა, რომ ყველაფერი კარგად დასრულდება.", - განაცხადა კობიაშვილმა.
