სრულიად საქართველოს კათოლიკოს-პატრიარქმა სიონის ღვთისმშობლის მიძინების სახელობის საკათედრო ტაძარში ახალი სასწავლო წლის დადგომასთან დაკავშირებით პარაკლისი გადაიხადა და ტაძარში შეკრებილ ახალგაზრდებს, სასულიერო სემინარიისა და აკადემიის პროფესორ-მასწავლებლებს ახალი სასწავლო წლის დაწყება მიულოცა.
პატრიარქმა ქადაგებისას ახალგაზრდებს მიმართა, რომ წიგნს უნდა კითხულობდნენ, რომელიც გაუკვლევს გზას ჭეშმარიტებისაკენ. უწმინდესმა შესთხოვა უფალს, რომ ახალგაზრდების მიერ მიღებული განათლება სასარგებლო იყოს მათთვის და ქვეყნისათვის.
„სასწავლებელი ეს არის ის დაწესებულება, სადაც ადამიანმა შეიძლება ბევრი რამ ისწავლოს და შეიძლება არაფერი არ გამოიტანოს სასწავლებლიდან. ბევრი რამ დამოკიდებულია თქვენზე. თქვენი პირველი თანამგზავრი უნდა იყოს წიგნი, წიგნს უნდა კითხულობდეთ და თქვენ გაიგნებთ გზას ჭეშმარიტებისაკენ.
ამ გასაღებით შენ უნდა გააღო ის დარბაზი, რომლითაც მიიღებ განათლებას. განათლება ღვთისაგან ბოძებული მადლია. ადამიანი ღირსი უნდა იყოს, რომ უფლის მადლი გადმოვიდეს მის გონებაზე", - განაცხადა პატრიარქმა.
