საქართველოს ფეხბურთის ფედერაციის აღმასკომის დღევანდელ სხდომაზე მიღებული გადაწყვეტილების მიხედვით, ფედერაციის არჩევნებში ხმის მიცემის უფლებით მხოლოდ რეგიონული ფედერაციების მიერ წარმოდგენილი 35 დელეგატი ისარგებლებს, 26 გუნდის ფეხბურთის ფედერაციაში წევრად გახდომის შემთხვევაში კი, ფედერაციის საპრეზიდენტო არჩევნებში მონაწილეობას საფეხბურთო გუნდების წარმომადგენლებიც მიიღებენ.
გადაწყვეტილებას არ ეთანხმება „დინამო თბილისის" პრეზიდენტი რომან ფიფია და მიიჩნევს, რომ კლუბების უფლებაა, იყვნენ ფედერაციის სუბიექტები და სარგებლობდნენ ფედერაციის არჩევნებზე ხმის უფლებით.
საქართველოს ფეხბურთის ფედერაცია 26 საფეხბურთო გუნდისთვის ფედერაციის წევრად გახდომას და მათთვის ხმის მიცემის საკითხს რიგგარეშე აღმასკომის სხდომაზე განიხილავს, რომელიც 1 დეკემბრამდე ჩატარდება.
აღმასრულებელი კომიტეტოს სხდომის დასრულების შემდეგ ფედერაციის ვიცე-პრეზიდენტმა გიორგი ფირცხალავამ ჟურნალისტებს განუცხადა, რომ საფეხბურთო კლუბებს ფედერაციამ წევრობაზე უარი არ უთხრა, უბრალოდ, კლუბების საკითხი გადაიდო იმის გამო, რომ გუნდების დოკუმენტაცია კვლავ არ ჰქონდათ წესრიგში.
„ჩვენ საქართველოს ფეხბურთის ფედერაციის წევრობაზე არავისთვის გვითქვამს უარი. უბრალოდ, ამ შემთხვევაში დოკუმენტაცია არ იყო სრულყოფილად წარმოდგენილი. ჩვენ პირველივე შესაძლებლობაზე წლის ბოლომდე რიგგარეშე ყრილობას ჩავინიშნავთ და იქ განვიხილავთ გუნდების გაწევრიანების საკითხს", - განაცხადა ფირცხალავამ.
ფედერაციის დღევანდელი გადაწყვეტილებით უკმაყოფილოა პრეზიდენტობის ერთ-ერთი კანდიდატი მამუკა კვარაცხელიაც. კვარაცხელია არ გამორიცხავს, რომ საქმე სასამართლომდეც მივიდეს.
„არ მესმის, რატომ არ აძლევენ კლუბებს ხმის უფლებას. უნდა შევხვდე ჩემს ყველა თანამოაზრეს, მათ შორის ლევან კობიაშვილსაც და მომდევნო ნაბიჯებზე შევჯერდეთ, რადგან ასე გაგრძელება არ შეიძლება", - განაცხადა მამუკა კვარაცხელიამ.
