„დემოგრაფიული განვითარების ფონდის" დირექტორი ზვიად ტომარაძე სოციალურ ქსელში განცხადებას ავრცელებს:

„მეგობრებო! მე და როინ მიგრიაული ვაგრძელებთ ჩვენი მოსახლეობის ინტერესების დაცვას და ვაგრძელებთ ბრძოლას „სითი პარკის" ყაჩაღობის წინააღმდეგ! სამწუხაროდ, ჩვენს პირველ კანონპროექტს, რომელიც პარლამენტმა 29 მაისს მიიღო და 15 ივნისს ამოქმედდა, რეალური შედეგი არ მოჰყოლია. რადგან: 1. „სითი პარკი" კანონში არსებულ ჩანაწერს „არ აფერხებს მოძრაობას" სათავისოდ კითხულობს და ნებისმიერი ავტომობილის საჯარიმო სადგომზე გადაყვანისას, ფეხითმოსიარულეთა „მოძრაობის შეფერხებით" ამართლებს. 2. ჩვენთვის გაურკვეველ ვითარებაში მე-2 და მე-3 მოსმენებს შორის კანონში გაჩნდა საეჭვო ჩანაწერი (სავარაუდოდ, „სითი პარკის" ლობირების შედეგად): „სატრანსპორტო საშუალებას ამკრძალავი ნიშნის „გაჩერება აკრძალულია", ან „დგომა აკრძალულია" მოქმედების ადგილიდან სპეციალურ დაცულ სადგომზე გადაიყვანენ იმ შემთხვევაში, თუ გადაყვანის შესახებ მინიშნება ახლავს ამკრძალავ ნიშანს". ეს ჩანაწერი ჩვენს კანონპროექტში არ იყო.

ჩვენ შევიმუშავეთ ახალი კანონპროექტი, რის მიხედვითაც:

1. ავტომანქანის გადაყვანა სპეციალურ ავტოსადგომზე შესაძლებელი იქნება მხოლოდ ორ შემთხვევაში: თუ სატრანსპორტო საშუალება აფერხებს საავტომობილო მოძრაობას, ან ქმნის საცობს. კანონში კონკრეტდება, რომ „საავტომობილო" მოძრაობის და არა ფეხითმოსიარულეთა შეფერხების შემთხვევაში ხდება ავტომობილის საჯარიმოზე გადაყვანა.

2. კანონიდან ხდება მესამე შემთხვევის ამოღება: „თუ ქმნის საავარიო სიტუაციას", რომლის შემთხვევაშიც „სითი პარკს" ჰქონდა მანქანის ევაკუირების შესაძლებლობა.

3. კანონიდან ხდება ჩანაწერის ამოღება: „სატრანსპორტო საშუალებას ამკრძალავი ნიშნის „გაჩერება აკრძალულია", ან „დგომა აკრძალულია" მოქმედების ადგილიდან სპეციალურ დაცულ სადგომზე გადაიყვანენ იმ შემთხვევაში, თუ გადაყვანის შესახებ მინიშნება ახლავს ამკრძალავ ნიშანს".

4. კანონს ემატება ჩანაწერი: „დაუშვებელია სპეციალურ დაცულ სადგომზე იმ ავტომანქანის გადაყვანა, რომელიც არღვევს ამკრძალავი ნიშნის „დგომა-გაჩერება აკრძალულია" ან „დგომა აკრძალულია" მოთხოვნას, მაგრამ არ აფერხებს საავტომობილო მოძრაობას ან არ ქმნის საცობს".

სავარაუდოდ, აღნიშნული კანონპროექტის ინიციატორი პარლამენტში კვლავ ზაქარია ქუცნაშვილი იქნება, მას ჩვენი ინიციატივა უკვე შევთავაზეთ", - წერს ზვიად ტომარაძე.