სააგენტო ТАСС-ის ინფორმაციით, რუსეთის პრეზიდენტმა ვლადიმირ პუტინმა ამერიკელ ჟურნალისტ ჩარლი როუზისთვის მიცემულ ინტერვიუში განაცხადა, რომ ჯერჯერობით არ იცის, მიიღებს თუ არა მონაწილეობას 2018 წლის საპრეზიდენტო არჩევნებში. გადაცემა ტელეკომპანიების CBS და PBS-ის ეთერში გავიდა. პუტინის განცხადებით, რუსეთი ეფექტური, კონკურენტუნარიანი, მდგრადი ეკონომიკის, განვითარებული სოციალური და პოლიტიკური სისტემის მქონე ქვეყანა უნდა იყოს და მისი გადაწყვეტილება „ქვეყანასა და მსოფლიოში კონკრეტულ სიტუაციაზე" და მის განწყობაზე იქნება დამოკიდებული.
რუსეთის პრეზიდენტის განცხადებითვე, ქვეყანას უნდა ჰქონდეს შესაძლებლობა, დაიცვას საკუთარი ინტერესები და გავლენა მოახდინოს ქვეყნისთვის მნიშვნელოვან პროცესებზე.
ვლადიმირ პუტინი უკრაინაში არსებულ ვითარებასაც შეეხო. მისი თქმით, მინსკის შეთანხმებების შესრულება აუცილებელია.
რაც შეეხება აშშ-ის პოლიტიკურ ხელმძღვანელობასთან ურთიერთობას, რუსეთის პრეზიდენტი ამბობს, რომ ბარაქ ობამასთან კარგი პირადი ურთიერთობა აკავშირებს, აშშ-ის სახელმწიფო მდივანი ჯონ კერი კი - უყვარს კიდეც.
