26 მაისის აქციის დაშლასთან დაკავშირებით მიხეილ სააკაშვილის  განცხადებას კობახიძე პარლამენტის რიგგარეშე სხდომაზე გამოეხმაურა და აღნიშნა, რომ ის, რაზეც სააკაშვილმა ისაუბრა, სამართალდამცავები უნდა დაინტერესდნენ. "ამ ადამიანს სჩვევია დიდი სიცრუის ტირაჟირება, მაგრამ ის, რაც მან 26 მაისთან დაკავშირებით განაცხადა, არის სკანდალური განცხადება. არ მინდა ქვეყანას მიხეილ სააკაშვილის განცხადებების გამო სტრატეგიულ პარტნიორთან და მეგობართან - ამერიკის შეერთებულ შტატებთან რაიმე პრობლემა შეექმნას. ძალიან უპასუხისმგებლო იყო პრეზიდენტის განცხადება იმის შესახებ, რომ თურმე 26 მაისის აქციის დარბევის ორგანიზება მოხდა ამერიკის ფედერალურმა საგამოძიებო ბიუროს თანამშრომლების თვალწინ, თურმე ისინი ისხდნენ შსს-ში და გეგმავდნენ დარბევას. სააკაშვილი ათას ტყუილს აცხადებს და ცხადია, ესეც ტყუილია, მაგრამ იქნებ პასუხი მოსთხოვოთ თქვენს პრეზიდენტს, რატომ აკეთებს ასეთ სკანდალურ განცხადებას ამერიკის შეერთებული შტატების მისამართით?" - მიმართა კობახიძემ უმცირესობას.