რუსეთის თავდაცვის სამინისტროს ოფიციალურმა წარმომადგენელმა იგორ კონაშენკოვმა სირიის ტერიტორიაზე პირველი ავიაერიშების განხორციელება ოფიციალურად დაადასტურა.
მისი თქმით, ავიაციამ სირიაში „ისლამური სახელმწიფოს" მებრძოლთა პოზიციებზე წერტილოვანი დარტყმების განხორციელება დაიწყო.
„რუსეთის ფედერაციის შეიარაღებული ძალების უმაღლესი მთავარსარდლის გადაწყვეტილებით, რუსეთის საჰაერო-კოსმოსური ძალების თვითმფრინავებმა საჰაერო ოპერაცია დაიწყეს და სირიის არაბული რესპუბლიკის ტერიტორიაზე დაჯგუფება "ისლამური სახელმწიფოს" ტერორისტთა სახმელეთო სამიზნეებზე წერტილოვან დარტყმებს ახორციელებენ", - განაცხადა იგორ კონაშენკოვმა.
მისი თქმით, რუსეთის თავდაცვის მინისტრმა სერგეი შოიგუმ აცნობა კოლეგებს „კოლექტიური უსაფრთხოების შეთანხმების ორგანიზაციიდან", რომ საჰაერო ოპერაციის ფარგლებში, რუსეთის საჰაერო-კოსმოსური ძალების თვითმფრინავები "ისლამური სახელმწიფოს" კუთვნილ სამხედრო ტექნიკას, სატრანსპორტო საშუალებებს, იარაღის საწყობებს ბომბავენ.
