გამოცემა „დოიჩე ველე"-ს მიერ გავრცელებული ინფორმაციით, აშშ-ის სახელმწიფო მდივანი ჯონ კერი და რუსეთის საგარეო საქმეთა მინისტრი სერგეი ლავროვი ერთმანეთს სირიაში არსებულ ვითარებაზე სასაუბროდ შეხვდნენ და სამხედრო კოორდინირების გაუმჯობესებაზე შეთანხმდნენ.
ამერიკელი და რუსი ექსპერტები ავიადარტყმების კოორდინირების საკითხზე სასაუბროდ ერთამანეთს, სავარაუდოდ, 1 ოქტომბერს შეხვდებიან.
აშშ-ის სახელმწიფო მდივანმა ასევე განაცხადა, რომ შეხვედრაზე სერგეი ლავროვთან ერთად გარკვეული წინადადებები შეიმუშავა, რომელიც სირიაში სამოქალაქო ომის დასრულებისკენ და პოლიტიკური პროცესის დაჩქარებისკენაა მიმართული.
ლავროვიც და კერიც აღნიშნულ წინადადებებს აშშ-ისა და რუსეთის ლიდერებს გააცნობენ. ორივე მხარე ასევე თანხმდება, რომ სირიაში ესკალაციის აცილება აუცილებელია. ჯონ კერის განცხადებით, აშშ-ის ადმინისტრაცია რუსეთთან დიალოგს აუცილებლად გააგრძელებს.
აშშ-ის სახელმწიფო მდივანმა კიდევ ერთხელ განაცხადა, რომ ვაშინგტონი შეშფოთებულია იმ დახმარებით, რომელსაც მოსკოვი სირიის პრეზიდენტ ბაშარ ალ-ასადს უწევს.
რუსულმა თვითმფრინავებმა სირიის ტერიტორიაზე ავიაიერიშების მიტანა გუშინ დაიწყეს. დასავლეთში ეჭვობენ, რომ „ისლამური სახელმწიფოს" ნაცვლად, რუსული ავიაცია ასადის ოპონენტების პოზიციებს ბომბავს.
