ქართველი პოეტი გოგლა ლეონიძე, რომელიც გამოჩენილი ქართველი მხატვრის ნიკო ფიროსმანის ბიოგრაფიას იკვლევდა და ხალხში გაფანტულ მის ნამუშევრებს აგროვებდა, იხსენებს, თუ როგორ დაიკარგა და განადგურდა ფიროსმანის ტილოები გასული საუკუნის 20-იან წლებში. გოგლა ლეონიძის დღიურის ფრაგმენტებს გაზეთი „რეზონანსი" აქვეყნებს.

„ფიროსმანიშვილის ბიოგრაფიული ფაქტების ჩაწერა დავიწყე 1922 წელს. ჩაწერას ვაწარმოებდი დღიურის სახით. მასალების შესაკრებად მე ვინახულე ღვინის ვაჭრები, ქუჩის მხატვრები, მღებავები, საზანდარები, მეთევზეები, დალაქები, ყასბები, მედროგეები, მეჩექმეები, რკინიგზის კონდუქტორები, მხატვრის მეგობრები, მცნობები და პატივისმცემლები. მე იქვე ვწერდი მათს საუბარს „საწყალ ნიკალას" უბრალოდ ცხოვრებაზედ.

ღრმა ღელეში მიმასწავლეს, იქაურ დუქნებში არის ბევრი სურათი ფიროსმანისო. წავედი, მაგრამ ვერავითარ სურათს ვერ მივაგენი. 1918 წელს შიმშილობისგან სურათები ავჭალელი და გლდანელი გლეხებისთვის პურზე გადაუცვლიათ. დუქნების მოხატულ კედლებზე კი ცარცი წაუსვამთ", - წერს თავის დღიურში გოგლა ლეონიძე.

წყარო: newspress.ge