საფრანგეთის თავდაცვის მინისტრმა ჟან-ივ ლე დრიანმა განაცხადა, რომ საფრანგეთის სამხედრო-საჰაერო ძალებმა სირიის ტერიტორიაზე ახალი ავიაიერიში მიიტანეს.

მისი თქმით, უახლოეს მომავალში ფრანგული ავიაცია ახალ ავიადარტყმებს განახორციელებს.

გავრცელებული ინფორმაციით, ფრანგულმა გამანადგურებლებმა „ისლამური სახელმწიფოს" ობიექტები სირიის ქალაქ რაყას რაიონში დაბომბეს.

„ეს სამიზნეები იმის გამო გავანადგურეთ, რომ ვიცით - სირიაში, განსაკუთრებით რაყაში, უცხოელი მებრძოლებისთვის საწვრთნელი ბანაკები მოქმედებს. მათი მისია „ისლამური სახელმწიფოსთვის" ბრძოლა არ არის. ისინი საფრანგეთსა და ევროპაში ჩამოსვლას და თავდასხმების განხორციელებას აპირებენ", - განაცადა ჟან-ივ ლე დრიანმა.

საფრანგეთის სამხედრო-საჰაერო ძალებმა სირიის ტერიტორია პირველად 27 სექტემბერს დაბომბეს. მანამდე, ფრანგული ავიაცია „ისლამური სახელმწიფოს" პოზიციებს მხოლოდ ერაყის ტერიტორიაზე ბომბავდა.