რუსეთის ფედერაციის პრეზიდენტმა ვლადიმირ პუტინმა სირიაში სამხედრო ოპერაციის მთავარი მიზანი დაასახელა. ტელეკომპანია რასიასთვის მიცემულ ინტერვიუში პრეზიდენტმა აღნიშნა, რომ რუსეთის ამოცანა სირიაში კანონიერი ხელისუფლების სტაბილიზაცია და პოლიტიკური კომპრომისის მოსაძებნად პირობების შექმნაა.
ინტერვიუს დროს ვლადიმირ პუტინმა რუსეთის საგარეო პოლიტიკაზეც ისაუბრა. მისი თქმით, ქვეყნის უსაფრთხოების უზრუნველსაყოფად და ეროვნული ინტერესებიდან გამომდინარე შესაძლოა მაღალტექნოლოგიური იარაღიც გამოიყენოს.
"რუსეთის საგარეო პოლიტიკა მშვიდობისმოყვარეა, ყოველგვარი გადაჭარბების გარეშე. თუ შევხედავთ მსოფლიო რუკას და იმას, რას წარმოადგენს რუსეთი, ცხადი ხდება, რომ ჩვენ არ გვჭირდება სხვა ტერიტორიები ან სხვა ბუნებრივი სიმდიდრე. რუსეთს საკმარისი აქვს ყველაფერი. ჩვენ არ გვჭირდება ვინმესთან ომი ან კონფლიქტი. არ გვაქვს არანაირი სურვილი თავიდან შევქმნათ იმპერია, აღვადგინოთ საბჭოთა კავშირი, მაგრამ ჩვენ უნდა დავიცვათ რუსეთის სუვერენიტეტი. რა თქმა უნდა ჩვენ ამას ვაკეთებდით და კვლავ გავაკეთებთ,"- განაცხადა ვლადიმირ პუტინმა.
