სამართლიანი არჩევნებისთვის უწყებათაშორისი კომისიის სხდომაზე საგარეჯოში მიმდინარე მოვლენები განიხილეს. სხდომის დასრულების შემდეგ, „საქართველოს პატრიოტთა ალიანსის" აღმასრულებელმა მდივანმა გოჩა თევდორაძემ „რეპორტიორს" განუცხადა, რომ „პატრიოტთა ალიანსის" მიერ დასმული საკითხები დღის წესრიგში დადგა და გადაწყვეტილებებიც იქნა მიღებული. თევდორაძის განმარტებით, მნიშვნელოვანია ის, რომ საგარეჯოს პოლიციის უფროსი დავით ჭიაბერაშვილი, რომელიც წინასაარჩევნო კამპანიაში უხეშად ერეოდა, თანამდებობიდან გაათავისუფლეს:
„უწყებათაშორის კომისიაზე განხილული იქნა რამდენიმე საკითხი, მათ შორის ის საკითხები, რაც „პატრიოტთა ალიანსმა" სხვადასხვა დროს წამოჭრა. ქალბატონ ირმა ინაშვილს წერილიც ჰქონდა გაგზავნილი შინაგან საქმეთა მინისტრის სახელზე, სადაც ნათქვამი იყო, რომ საარჩევნო კამპანიაში აქტიურად და უხეშად ერეოდა საგარეჯოს პოლიციის უფროსი დავით ჭიაბერაშვილი. ამ საკითხთან დაკავშირებით დღესაც ვისაუბრეთ და მსჯელობის დროს, შს სამინისტროს წარმომადგენელმა, რომელიც ამავდროულად არის უწყებათაშორისი კომისიის წევრი, განაცხადა - პოლიციელი, რომელზეც საუბრობდა „პატრიოტთა ალიანსი", თანამდებობიდან გათავისუფლებულია. უწყებათაშორის კომისიაზე ზუსტად ასე ითქვა - თქვენს მიერ დაყენებული საკითხების შემოწმების საჭიროება არ არსებობს და პოლიციელი, რომელიც ერეოდა საარჩევნო პროცესებში, თანამდებობიდან გავათავისუფლეთ.
ამ პოლიციელის შესახებ ქალბატონ ირმას არაერთხელ უსაუბრია. როგორც ირკვევა, წინასაარჩევნო კამპანიის დროს, სხვადასხვა პროვოკაციას თავად პოლიცია აწყობდა.
ამის გარდა, უწყებათაშორის კომისიაზე დავსვით სხვა საკითხებიც - რეინჯერებზე, სატყეოს წარმომადგენლებზე, ექიმებზე, საარჩევნო კამპანიაში არასწორად ჩარევის შესახებ. ამის შემდეგ, უწყებათაშორისი კომისიის თავმჯდომარემ განაცხადა, რომ დარღვევები, რომელიც არსებობდა, აღარ უნდა განმეორდეს. რეკომენდაციები მიეცა ინფრასტრუქტურისა და ჯანდაცვის სამინისტროებს", - განაცხადა თევდორაძემ „რეპორტიორთან" საუბრისას.
თავისუფალი და სამართლიანი არჩევნებისთვის უწყებათაშორისი კომისიის მორიგი სხდომა იუსტიციის სახლში გაიმართა.
