პარტია „ქართული დასი" განცხადებას ავრცელებს, სადაც ნათქვამია, რომ დღეს ოპოზიციური პარტიების მიერ გავრცელებულ განცხადებაში, სადაც საუბარია მედიის დამოუკიდებლობაზე, „ქართულ დასი" არ არის ხელმომწერი, რადგან განცხადების ტექსტს არ იცნობს: 

„დღეს, 13 ოქტომბერს, ტელეკომპანია „რუსთავი 2"-ის გადაცემა „კურიერმა" გაავრცელა ინფორმაცია და ძველი კადრები, „ქართული დასის" ლიდერის ჯონდი ბაღათურიას მონაწილეობით.

ინფორმაცია შეეხებოდა არასაპარლამენტო ოპოზიციური პარტიების მიერ „რუსთავი 2"-ის მხარდამჭერ ერთობლივ განცხადებას.

ჩვენ ამ განცხადების შინაარს საერთოდ არ ვიცნობთ და შესაბამისად, არც ხელი მოგვიწერია.

აქედან გამომდინარე, მოვუწოდებთ კოლეგებსაც პოლიტიკური პარტიებიდან და ტელეკომპანია „რუსთავი 2"-საც, დაზუსტებულ იქნეს ინფორმაცია და დააკონკრეტდეს განცხადების ავტორი და ხელმომწერი პარტიები", - ნათქვამია პოლიტიკური პარტიის განცხადებაში.

არასაპარლამენტო ოპოზიციამ „რუსთავი 2"-თან დაკავშირებით განცხადება გაავრცელა და ხელისუფლებას შეახსენა, რომ სიტყვისა და გამოხატვის თავისუფლება, დამოუკიდებელი და პლურალისტური მედია - დემოკრატიის ფუნდამენტური ორიენტირია, რომლის არსებობაც, სამწუხაროდ, დღეს საქართველოში კითხვის ნიშნის ქვეშ დადგა.