უფლებადამცველი ალექსანდრე კობაიძე, „რეპორტიორთან" საუბრისას „კანონიერი ქურდის“ ტარიელ ფოცხვერიას სასჯელაღსრულების დაწესებულებიდან გათავისუფლების მოთხოვნის ფაქტს ეხმაურება.
„სისხლის სამართლის კოდექსის 283-ე მუხლის თანახმად, მძიმე ავადმყოფს შეიძლება განაჩენის აღსრულება გადაევადოს ექსპერტიზის დასკვნის საფუძველზე გარკვეული ვადით, ხოლო მსჯავრდებულმა მინიმუმ წელიწადში ერთხელ მაინც უნდა წარუდგინოს სასამართლოს ექსპერტიზის დასკვნა ჯამრთელობის შესახებ. იმ შემთხვევში, თუ მსჯავრდებული არ წარადგენს ექსპერტიზის დასკვნას ჯანმრთელობის შესახებ სასამართლო უფლებამოსილია, შეცვალოს გადაწყვეტილება განჩინების მეშვეობით და ისევ უკან დააბრუნოს მსჯავრდებული.
რაც შეეხება ფოცხვერიას მაგალითს, მისი ინტერესების დამცველების განმარტებით, მისი მდგომარეობა მძიმეა, თუმცა, აქ ერთი ფაქტორია გასათვალისწინებელი - უნდა გაანალიზდეს, რამდენად იქნება სამართლებრივი სიკეთის მომტანი, რამდენად სწორი იქნება მსჯავრდებულ ტარიელ ფოცხვერიას სასჯელაღსრულების დაწესებულებიდან გათავისუფლება ამ საფუძვლით. ასევე, გასაანალიზებელია, რამდენად საშიში და ქვეყნის ინტერესებისათვის საზიანო იქნება ტარიელ ფოცხვერიას, როგორც კრიმინალური ავტორიტეტის გათავისუფლება",-აღნიშნავს კობაიძე.
ცნობისთვის: ტარიელ ფოცხვერია 2012 წელს ამნისტიის საფუძველზე გათავისუფლდა, თუმცა გათავისუფლებიდან მე-12 დღეს დააკავეს. ე.წ. კანონიერი ქურდის ოჯახი ფოცხვერიას გათავისუფლებას მისი ჯანმრთელობის მდგომარეობის გაუარესების საფუძველზე ითხოვს.
