„ავღანეთში ამერიკელი სამხედროები 2016 წლის შემდეგაც დარჩებიან," - განცხადება აშშ-ის პრეზიდენტმა ბარაქ ობამამ თეთრ სახლში გამართულ პრესკონფერენციაზე გააკეთა.

ობამას თქმით, 2017 წელს, მისი პრეზიდენტობის დასასრულისთვის, ავღანეთში ამერიკელი სამხედროების რიცხვი 5 500 ჯარისკაცით განისაზღვრება.

ავღანეთში დისლოცირებული ამერიკული კონტინგენტის რაოდენობა 2016 წლამდე არ შემცირდება და ქვეყანაში 9 800 სამხედრო მოსამსახურე დარჩება.

აშშ-ის პრეზიდენტის გადაწყვეტილებით, ამერიკელი სამხედროები ოთხ ადგილას: ქაბულში, ბაგრამში, ჯალალაბადსა და ყანდაღარში დარჩებიან.

მიღებული გადაწყვეტილების თანახმად, ავღანეთში აშშ-ის საბრძოლო მისია დასრულდა და ამიერიდან ამერიკელი სამხედროები ავღანელი ჯარისკაცების წვრთნისა და კონტრტერორისტული საქმიანობით დაკავდებიან.

თავდაპირველად, ავღანეთში მხოლოდ მცირე კონტინგენტის დატოვება იგეგმებოდა, თუმცა ამერიკელი სამხედროები ფიქრობენ, რომ „თალიბანის" მხრიდან მზარდი საფრთხეების ფონზე, ავღანეთის არმიის დახმარება აუცილებელია.