რუსეთის პრეზიდენტმა ვლადიმირ პუტინმა დსთ-ის ლიდერთა საბჭოს სხდომაზე განაცხადა, რომ სირიაში საჰაერო ოპერაცია მანამდე გაგრძელდება, სანამ სირის არმია ტერორისტების წინააღმდეგ შეტევით ოპერაციებს არ დაასრულებს.

პუტინის მოსაზრებით, სირიაში რუსეთის საჰაერო ოპერაცია ლეგიტიმურია, რადგან სირიის პრეზიდენტის ბაშარ ალ-ასადის ოფიციალური თხოვნის საფუძველზე დაიწყო.

„ავიაციას და სხვა საშუალებებს მხოლოდ ტერორისტული დაჯგუფებების წინააღმდეგ ვიყენებთ", - განაცხადა ვლადიმირ პუტინმა.

რუსეთი სირიაში საჰაერო ოპერაციებს 30 სექტემბრიდან ატარებს. მოსკოვში აცხადებენ, რომ სამხედრო-საჰაერო ძალების მთავარი სამიზნე - „ისლამური სახელმწიფოა", თუმცა დასავლეთში ეჭვობენ, რომ რუსეთი ოპერაციას პრეზიდენტ ბაშარ ალ-ასადის ოპონენტების წინააღმდეგ ატარებს.