„BBC"-ის ცნობით, თურქეთის სამხედრო-საჰაერო ძალებმა უპილოტო საფრენი აპარატი ჩამოაგდეს. საფრენი აპარატი თურქეთის საჰაერო სივრცეში სირიის მხრიდან შეიჭრა.
თურქეთის სამხედრო უწყების განცხადებით, თურქეთის სივრცეში შეჭრის შემდეგ, უპილოტო საფრენმა აპარატმა ფრენა რამდენიმე გაფრთხილების მიუხედავად გააგრძელა. თურქულმა გამანადგურებლებმა ის თურქეთ-სირიის საზღვრიდან დაახლოებით 3 კილომეტრში ჩამოაგდეს.
რუსეთის თავდაცვის სამინისტროს ოფიციალური წარმომადგენლის იგორ კონაშენკოვის ინფორმაციით, სირიაში დისლოცირებული ყველა რუსული თვითმფრინავი, ამოცანის შესრულების შემდეგ ავიაბაზაზე დაბრუნდა, უპილოტო საფრენი აპარატები კი „გეგმიური რეჟიმის ფარგლებში ფუნქციონირებენ".
ჯერ უცნობია, თუ რომელ ქვეყანას ეკუთვნოდა უპილოტო საფრენი აპარატი.
სააგენტო „როიტერს" აშშ-ის მთავრობის წარმომადგენელმა განუცხადა, რომ წინასწარი ინფორმაციით, აპარატი შესაძლოა, რუსეთს ეკუთვნოდეს.
მიმდინარე თვის დასაწყისში რუსულმა სამხედრო თვითმფრინავებმა თურქეთის საჰაერო სივრცე ორჯერ დაარღვიეს.
