"უფლებას არ მოგცემთ, ის ადამიანები, რომლებიც ახლა ამ დარბაზში ვსხედვართ და არაფერ შუაში ვართ, რადგან არავისთვის მიგვიცია მანდატი, ასეთი ჩანაწერები ეკეთებინა, ამ სიბინძურესთან დაგვაკავშიროთ!" - ეს განცხადება გიორგი ბარამიძემ პარლამენტში უკანონო მოსმენებთან და ფარულ ჩანაწერებთან დაკავშირებით მომზადებული საკანონმდებლო პაკეტის განხილვასას გააკეთა. როგორც მან აღნიშნა, რამდენი ათასიც არ უნდა იყოს ეს მასალა და რამდენი პირიც არ უნდა იყოს გარეული, ყველა უნდა დაისაჯოს - „როგორც ჩანს, ჩანაწერები, რაც გაკეთდა მაშინდელ ოპოზიციაზე, ერთი იმდენი იქნება ხელისუფლებაზე და უფლებას არ მოგცემთ, ამის გამკეთებლებს ხელ დააფაროთ, რათა დღევანდელ ხელისუფლებასთან რაღაც გარიგებაში შევიდნენ. უმსგავსობა, რაც ადამიანების უკანონო მოსმენებისა და ჩაწერის სახით ხდებოდა, ზოგ-ზოგიერთს ხელისუფლებაში ძალიან მოეწონა და ახლა ადგილი აქვს მცდელობას გამოიყენოს თავისი მიზნებისათვის" - მათ შორის პოლიტიკური მიზნებისთვის" - განაცხადა ბარამიძემ. შეგახსენებთ, რომ ცვლილებებით, სისხლის სამართლებრივი პასუხისმგებლობისგან ის პირები გათავისუფლდებიან, რომლებიც კანონის ამოქმედებიდან ერთი თვის ვადაში საგამოძიებო ორგანოებში გამოცხადდებიან და ნებაყოფლობით ჩააბარებენ სისხლის სამართლის კოდექსის 158-ე და 159-ე მუხლებით გათვალისწინებულ კერძო კომუნიკაციის ჩანაწერს, კომპიუტერულ მონაცემს, ტექნიკური საშუალებით მოპოვებულ ინფორმაციას, პირადი მიმოწერის ამსახველ მასალას, საფოსტო გზავნილს, ტელეფონით ან სხვა ტექნიკური საშუალებით საუბრის ჩანაწერს, ასევე ტელეგრაფით, ფაქსით ან სხვა ტექნიკური საშუალებით მიღებულ ან გადაცემულ ინფორმაციას.
