„ხელისუფლებას მოვუწოდებ, დაუყოვნებლივ დაიწყოს გამოძიება მოსამართლე ურთმელიძის წინააღმდეგ გაკეთებულ განცხადებებზე!" - ამ განცხადებას ადვოკატი შალვა ხაჭაპურიძე „რეპორტიორთან" საუბრისას აკეთებს. ხაჭაპურიძის განმარტებით, 366-ე მუხლი ითვალისწინებს 2 წლამდე თავისუფლების აღკვეთას იმ პირის მიმართ, ვინც სამართალწარმოების მოსამართლის მიმართ შეურაცხმყოფელი დამოკიდებულებებით გამოირჩევა: 

„სისხლის სამართლის კოდექსის 366-ე მუხლი - სასამართლოს უპატივცემულობა, რაც გამოიხატა სამართალწარმოების მოსამართლის შეურაცხყოფით, რაც ითვალისწინებს თავისუფლების აღკვეთას 2 წლამდე ვადით. დაუყოვნებლივ აღიძრას სისხლის სამართლის საქმე, ვინც მოსამართლეს იხსენიებს იმგვარად, რასაც ვისმენთ ბოლო დღეების განმავლობაში. ეს გასცდა კრიტიკას, გამოხატვის თავისუფლებას. მოვუწოდებ ხელისუფლებას - სამართლებრივი პრესინგი ნებისმიერ ნაბიჯზე! მკაცრი სამართლებრივი პრესინგია საჭირო! მე კონკრეტული მუხლი დაგისახელეთ, ამას გარდა არის კიდევ რამდენიმე მუხლი. თუ ამას ხელისუფლება არ გააკეთებს, ჩვენ ვიქნებით იძულებული, მივმართოთ პროკურატურას, დაიწყონ სისხლის სამართლის საქმის გამოძიება ხსენებული მუხლებით!" - განაცხადა შალვა ხაჭაპურიძემ.