თავდაცვის მინისტრი, ირაკლი ალასანია, სამხედრო სფეროში მომუშავე მეცნიერთა ჯგუფს შეხვდა. მხარეებმა სამხედრო უსაფრთხოების სფეროში არსებულ პრობლემებსა და აქტუალურ საკითხებზე ისაუბრეს. საუბარი შეიარაღების სისტემას, სამხედრო გეოგრაფიის საკითხებსა და საქართველოს ტერიტორიის თავდაცვისათვის საჭირო, საინჭინრო მომზადებას შეეხო.
ირაკლი ალასანიამ ქვეყნის სამხედრო უსაფრთხოების სისტემაში სამხედრო მეცნიერების მნიშვნელობაზე ისაუბრა. მან ყურადღება საქართველოს შეიარაღებულ ძალებში სამხედრო-საინჟინრო დარგში ჩატარებული კვლევების შედეგების პრაქტიკულ რეალიზაციაზე გაამახვილა.მინისტრმა იმედი გამოთქვა, რომ მსგავსი შეხვედრები რეგულარულ ხასიათს მიიღებს:
„თავდაცვის სამინისტრო აფართოებს თანამშრმლობას სამხედრო-სამეცნიერო ინტელიგენციასთან. ქვეყანაში სამხედრო-საინჟინრო მეცნიერების განვითარების კუთხით ძალიან დიდი პოტენციალი არსებობს, რაც თავდაცვის სამინისტროსა და საქართველოს შეიარაღებული ძალების გაერთიანებულ შტაბს სამხედრო-სტრატეგიულ დაგეგმარებაში გამოადგება. შევთანხმდით თანამშრომლობის ფორმებზე, მათ შორის, ჩვენს სამეცნიერო კვლევით ინსტიტუტთან. დარწმუნებული ვარ, ამ დიდი რესურსის ამოქმედება თავდაცვის სამინისტროს დაგეგმარების პროცესში ძალიან წაადგება" - განაცხადა ალასანიამ.
შეხვედრას საქართველოს შეიარაღებული ძალების გაერთიანებული შტაბის უფროსის მოადგილე ბრიგადის გენერალი ვახტანგ კაპანაძე და საქართველოს ეროვნული თავდაცვის აკადემიის რექტორი ზურაბ აგლაძეც დაესწრნენ.
