„მემარცხენე ალიანსის" ლიდერმა, სოსო შატბერაშვილმა „რეპორტიორის" პრესკლუბში მიმდინარე პოლიტიკური მოვლენები შეაფასა და მოსახლეობას დემოკრატიულად ჩატარებული არჩევნები მიულოცა.
„საქართველოს უახლეს ისტორიაში მოხდა სერიოზული რამ, 2012-2013 წლებში მშვიდობიანად შეიცვალა ხელისუფლება. აქამდე, ეს პროცესი ძალადობით ხდებოდა. ჩატარდა არჩევნები, რომელიც მიახლოებული იყო ევროპულ სტანდარტებთან. იყო გარკვეული შეცდომები. მაგალითად, საარჩევნო კოდექსი არ შეცვლილა, ძველი, გაბერილი სიებით ჩატარდა არჩევნები, ბევრი პრეტენზია გვაქვს, მაგრამ „კუდის", „სოდის" და ზონდერბრიგადების გარეშე ჩატარდა და ვულოცავ ხალხს. მეორე საკითხია, რამდენად მისაღებია ჩვენთვის ახალი პრეზიდენტი და პრემიერი, თუმცა, ხელისუფლების მშვიდობიანი შეცვლის ფაქტი აღსანიშნავია", - განაცხადა შატბერაშვილმა და მისი პარტიის სამომავლო გეგმებზე ისაუბრა.
როგორც „მემარცხენე ალიანსის" ლიდერი ამბობს, თანაპარტიელებთან ერთად, აპირებს აქტიურად ჩაერთოს ქვეყნის პოლიტიკურ საქმიანობაში.
„საპრეზიდენტო არჩევნებში ჩვენ არანაირი მიზანი არ გვქონია, ვიყავით ნეიტრალურები. მიზანი ერთი იყო - არჩევნები მშვიდად ჩატარებულიყო. ჩვენ მხარს არ ვუჭერდით არცერთ კანდიდატს. ახლა გვაქვს მიზანი - მოვხვდეთ თბილისის და სხვა რეგიონულ საკრებულოებში. ამ პროცესში აქტიურად ჩავერთვებით. გვაქვს შორეული გეგმებიც - საპარლამენტო არჩევნები. ჩვენ ვაცხადებთ, რომ უნდა ჩატარდეს რიგგარეშე საპარლამენტო არჩევნები, რომელიც ნაწილობრივ გაყალბდა. „ნაციონალური მოძრაობა" არ არის მთავარი პოლიტიკური ოპოზიციური ძალა", - აღნიშნა შატბერაშვილმა.
