ხუდონჰესის მშენებლობასთან დაკავშირებით, „მემარცხენე ალიანსის" ლიდერი სოსო შატბერაშვილი „ქართულ ოცნებას" წინასაარჩევნო დაპირებებს ახსენებს.
როგორც შატბერაშვილმა „რეპორტიორის" პრესკლუბში გამართულ ბრიფინგზე განაცხადა, მისმა პარტიამ ყურადღებით შეისწავლა „ქართული ოცნების" წინასაარჩევნო დაპირებები.
„ბატონმა ბიძინამ აღნიშნა, რომ გრანდიოზული ჰესების მშენებლობა ქვეყნისთვის დამღუპველი იქნება. კომიკური სიტუაცია იქმნება, მოსახლეობა ეწინააღმდეგება ჰესის მშენებლობას, ენერგეტიკის მინისტრი კი აცხადებს, რომ ეს ჰესი მაინც აშენდება", - ამბობს შატბერაშვილი.
„მემარცხენე ალიანსის" ლიდერი, შალვა ნათელაშვილის მიერ გაკეთებულ განცხადებასაც აფასებს და აღნიშნავს, რომ არჩევნები გიორგი მარგველაშვილმა მოიგო და გადაჭარბებულს უწოდებს ყოფილი თანაპარტიელის ნათქვამს.
„ბრალდებები გარკვეულწილად რეალურია. ეჭვი შეილება გაუჩნდეს ნებისმიერ საპრეზიდენტო კანდიდატს, მილიონით არის გაზრდილი ამომრჩეველთა სია. ამ სიების პრობლემა აუცილებლად უნდა მოგვარებულიყო ერთი წლის განმავლობაში. ამ არჩევნებში სამთავრობო რესურსები დანამდვილებით იყო გამოყენებული, რაც ეჭვს აჩენს. გადაჭარბებულად მეჩვენება ის ამბავი, რომ პირველი და მეორე ადგილი დაიკავა შალვა ნათელაშვილმა. გაიმარჯვა გიორგი მარგველაშვილმა და ამას დადებითად ვაფასებთ", - განაცხადა შატბერაშვილმა.
