22 ნოემბერს, გიორგობის დღესასწაულთან დაკავშირებით, მოქალაქეები ვიდეოპაემნის სერვისით უფასოდ ისარგებლებენ. აღნიშნული ინიციატივა სასჯელაღსრულების, პრობაციისა და იურიდიული დახმარების სამინისტროს ეკუთვნის.

სასჯელაღსრულების პრობაციისა და იურიდიული დახმარების მინისტრის მოადგილის, გიგა გიორგაძის განცხადებით, მოქმედი კანონმდებლობის თანახმად, მსჯავრდებულის თანხმობის შემთხვევაში, ვიდეოპაემნით სარგებლობა შეუძლია ნებისმიერ მოქალაქეს, სერვისის ხანგრძლივობა 15 წუთით განისაზღვრება და მისი ღირებულება 15 ლარს შეადგენს, სოციალურად დაუცველი მოქალაქეები გადასახადისგან გათავისუფლებულნი არიან.

„თბილისის, ქუთაისის, თელავის, ახალციხის, ბათუმისა და გორის პრობაციის ოფისებში ვიდეოპაემანზე მისული მოქალაქეები სასჯელაღსრულების დაწესებულებებში, ქალთა N5, არასრულწლოვანთა N11 სპეციალური, ქსნის N15 და რუსთავის N17 დაწესებულებაში მყოფ ახლობლებს გადასახადის გადახდის გარეშე დაუკავშირდებიან", - განაცხადა გიგა გიორგაძემ.