მოსამართლე თამაზ ურთმელიძემ ტელეკომპანია „რუსთავი 2"-ის წინააღმდეგ ბიზნესმენ ქიბარ ხალვაშის სარჩელზე სასამართლო პროცესზე არ დააკმაყოფილა „რუსთავი 2"-ის ადვოკატების შუამდგომლობა, სადაც ისინი ქიბარ ხალვაშის განცხადების მტკიცებულებად დართვას ითხოვდნენ, რომელიც ე.წ. ბალანსის ნაშთის დოკუმენტებს ეხებოდა.

ურთმელიძის განცხადებით, სოციალური ქსელის გვერდის ამონაწერი არ შეიძლება აღიარებად იქნეს მიჩნეული. მოსამართლემ არ დააკმაყოფილა არც მეორე შუამდგომლობა, სადაც „რუსთავი 2"-ის ადვოკატები 2004 წელს ეროსი კიწმარიშვილის განცხადების მტკიცებულებად დართვას შეეხებოდა არხის გაკოტრებასთან დაკავშირებით.

მოსამართლის განცხადებით, ახალი მტკიცებულებების მიღება არ არის გათვალისწინებული.

„რუსთავი 2"- ის ადვოკატები საქმეში ახალი მტკიცებულებების დართვას მოითხოვდნენ. კერძოდ, საქმე ეხება ქიბარ ხალვაშის განცხადებას, რომელიც სოციალურ ქსელში გავრცელდა.

„რუსთავი 2"- ის ადვოკატები აცხადებენ, რომ ქიბარ ხალვაშის განცხადება ეწინააღმდეგება მისი წარმომადგენლების მიერ სასამართლოზე გაკეთებულ განცხადებებს.

„ე.წ. საბალანსო ნაშთები, რომელიც ხელმოწერილი იყო რევაზ ბერიაშვილის მიერ და, რომელზეც მოსარჩელემ განაცხადა, რომ შედგენილი იყო 2006 წელს, ქიბარ ხალვაშმა გააკეთა განცხადება, რომ მას ეს დოკუმენტები კომპიუტერში ჰქონდა. ეს ადასტურებს, რომ ეს დოკუმენტი 2006 წელს არ იქნა შედგენილი", - განაცხადა „რუსთავი 2"-ის ადვოკატმა დიმიტრი საძაგლიშვილმა.