„რუსთავი 2"-ის ადვოკატის თამთა მურადაშვილის განცხადებით, მოულოდნელი იყო „რუსთავი 2"-ის მხარისთვის, რომ შემაჯამებელი გადაწყვეტილება დღეს იქნებოდა.

მოსამართლე თამაზ ურთმელიძის განცხადებით, შემაჯამებელ გადაწყვეტილებას დღეს, 17:30 საათზე, გამოაცხადებს ქიბარ ხალვაშის სარჩელთან დაკავშირებით.

„ახლა, ზუსტად 15:00 საათზე, დასრულდა საქმის განხილვა და მოსამართლემ განაცხადა, რომ გადაწყვეტილებას დღეს, 17:30 საათზე გამოაცხადებს. ვკითხეთ, გადათქვა თუ არა თავისი პოზიცია, რომ მას დასჭირდებოდა რამდენიმე დღე გასააზრებლად, მან იგივე გამიმეორა, რომ გადაწყვეტილებას გამოაცხადებს დღეს", - განაცხადა თამთა მურადაშვილმა.

რაც შეეხება შემაჯამებელ გადაწყვეტილებებთან დაკავშირებულ მოლოდინს მოპასუხე მხარეს მიაჩნია, რომ მოსამართლე ან სრულად დააკმაყოფილებს ქიბარ ხალვაშის სარჩელს, ან ნაწილობრივ და კერძოდ, არ დააკმაყოფილებს სარჩელს იმ ნაწილში, სადაც საავტორო უფლებებზეა საუბარი.

„მოლოდინი იყო, რომ ის სრულყოფილად მოისმენდა პროცესების ჩანაწერს და სრულყოფილად შეაფასებდა ყველა გარემოებას. მეეჭვება, რომ მოსამართლეს ეს ჰქონდეს გაკეთებული. ამიტომ, აქედან გამომდინარე, მოლოდინი გვაქვს, რომ იგი ვინაიდან გადახრილი იყო პროცესების მიმდინარეობისას მოსარჩელე მხარეს, დააკმაყოფილებს ქიბარ ხალვაშის სარჩელს ან სრულად, ან ნაწილობრივ. თუ ნაწილობრივ დაკმაყოფილდა სარჩელი, მოლოდინი გვაქვს, რომ საავტორო უფლებების ნაწილში არ დაკმაყოფილდება", - განაცხადა თამთა მურადაშვილმა.