„თბილისის  საქალაქო სასამართლომ  სრულად  გაიზიარა საქართველოს მთავარი პროკურატურის მიერ წარდგენილი მტკიცებულებები და 1 130 401 აშშ დოლარის თაღლითურად დაუფლების ფაქტზე   დამნაშავედ  ცნო ერთი პირი  საქართველოს სისხლის სამართლის კოდექსის 180-ე მუხლით", - საქართველოს მთავარი პროკურატურა განცხადებას ავრცელებს:

„საქართველოს მთავარ პროკურატურას დაუკავშირდნენ იაპონური კომპანიის  „HONDA SUISAN CO LTD"-ის წარმომადგენლები,  რომელთაც განაცხადეს,  რომ ელექტრონული ფოსტის გატეხის შედეგად, მათივე კომპანიის ანგარიშიდან, უცხო პირების მიერ მოტყუებით საქართველოში არსებული ერთ-ერთი კომპანიის ანგარიშზე  გადაირიცხა დიდი ოდენობით ფულადი თანხები.

საქართველოს მთავარმა პროკურატურამ გამოძიება დაიწყო თაღლითობის ფაქტზე. დადგინდა, რომ საქართველოს მოქალაქე გამოძიებით დაუდგენელ პირებთან ერთად ელექტრონული ფოსტის მეშვეობით დაუკავშირდა იაპონური კომპანიის წარმომადგენლებს მათივე ბიზნეს-პარტნიორის სახელით და საქართველოში ერთ-ერთ საბანკო ანგარიშზე მოტყუებით გადმოარიცხვინა 1 130 401 აშშ დოლარი.

ჩატარებული გამოძიების შედეგად პროკურატურამ დააკავა დანაშაულის ჩამდენი პირი,   დაყადაღებულ იქნა დანაშაულებრივი გზით დაუფლებული თანხა 1 130 401 აშშ დოლარი; შესაბამისად, ბრალდებულს არ მიეცა თაღლითურად დაუფლებული თანხების  განკარგვის შესაძლებლობა და დროულად იქნა აღკვეთილი ხსენებული დიდი ოდენობით თანხების შემდგომი ლეგალიზაციის საფრთხე;

საქართველოს მთავარმა პროკურატურამ დაზარალებულს სრულად დაუბრუნა თაღლითობის შედეგად ბრალდებულის მიერ მისაკუთრებული თანხა;

საქართველოს პროკურატურა არ დატოვებს სამართლებრივი რეაგირების გარეშე არც ერთ მსგავს ფაქტს და ყოველთვის უზრუნველყოფს, როგორც საქართველოს მოქალაქეების, ასევე უცხო ქვეყნის მოქალაქეების კანონიერი ინტერესების დაცვას", - ნათქვამია პროკურატურის განცხადებაში.