ეროსი კიწმარიშვილის ძმის, ზურა კიწმარიშვილის განცხადებით, ტელეკომპანია „რუსთავი 2"-ის მეწილეებს შორის მიმდინარე სასამართლო დავაში ეროსი კიწმარიშვილის სამართალმემკვიდრე, ია კიწმარიშვილი ჩაერთვება.
როგორც ეროსი კიწმარიშვილის ძმამ გადაცემაში „პოლიტიკა" განაცხადა, სასამართლოს გადაწყვეტილებაში, რომელიც გამოტანილ იქნა, ეროსის მიერ მიცემულმა ჩვენებებმა დიდი როლი ითმაშეს, ამიტომ, გულდასაწყვეტია, როდესაც მესაკუთრეებს შორის ეროსი კიწმარიშვილის სამართალმემკვიდრე ნახსენები არ არის.
„ვთვლი, რომ ამ ბატონებს სრული უფლება აქვთ, თავიანთი ინტერესების დაცვისათვის გარკვეულ ღონისძიებებს მიმართონ, მათ შორის სასამართლოს, რაც მოხდა კიდეც. ჩვენ უკვე ხელთ გვაქვს გადაწყვეტილება- ერთიც და მეორეც.
საკმაოდ მძიმეა ჩემთვის, როდესაც წილობრივ საკითხებზე არის საუბარი და იქ ეროსი კიწმარიშვილი ან მისი სამართალმემკვიდრე ნახსენები არ არის. დავით დვალი ყოველთვის აფიქსირებდა, რომ ის და ჯარჯი დავობენ თავიანთი წილის შესახებ და სხვის მაგივრად ისინი ვერ იდავებენ. მას არასდროს არ უთქვამს, რომ ეროსის სამართალმემკვიდრეს არ აქვს უფლება, ლეგიტიმურად იბრძოლოს თავისი წილისთვის. თუმცა, ზოგადად ჩემთვის მძიმე იყო, როდესაც ეროსის ხსენება იშვიათად ხდებოდა.
ია კიწმარიშვილი ჩაერთვება ამ პროცესში და ვფიქრობ, მას ექნება ლეგიტიმური უფლება, იბრძოლოს თავისი ინტერესებისთვის",- განაცხადა ზურა კიწმარიშვილმა.