დღეს, საერთაშორისო სატრანზიტო პროექტის, „კომბინირებული მატარებელი „ვიკინგი"-ს («VIKING Train») მონაწილე სარკინიგზო ადმინისტრაციებისა და ცნობილი ლოჯისტიკური კომპანიების სამუშაო თათბირი გაიმართა.
კომბინირებული მატარებელი „ვიკინგი" წარმოადგენს ლიტვის, უკრაინის, ბელარუსის, რუმინეთის, ბულგარეთის, მოლდოვის, თურქეთის ერთობლივ სარკინიგზო პროექტს. იგი ბალტიისპირეთის რეგიონის საზღვაო საკონტეინერო ჯაჭვს შავი ზღვისა და ხმელთაშუა ზღვის ანალოგიურ სისტემებთან აკავშირებს.
შეხვედრაზე მხარეებმა განიხილეს პროექტის მიმდინარეობის ანგარიში და სამომავლო პერსპექტივები.
პროექტში საქართველოს მონაწილეობით შესაძლებელი ხდება საკონტეინერო სატრანზიტო გადაზიდვებში ამიერკავკასიის, შუა აზიის ქვეყნების, აღმოსავლეთ ევროპის რეგიონთან, ბალტიისპირეთის და სკანდინავიურ ქვეყნებთან დაკავშირება, რაც მნიშვნელოვანი ხელშემწყობი ფაქტორია, რომ საქართველომ შეიძინოს ევროპა-აზიის დამაკავშირებელი სატრანსპორტო ჰაბის ფუნქცია.
კომბინირებული სატრანსპორტო მატარებლის „ვიკინგის" რეგულარული მოძრაობა 2003 წლის 6 თებერვალს დაიწყო. საქართველო მას მიმდინარე წლის აპრილში შეუერთდა.
