„რუსთავი 2"-ის საქმეზე საკონსტიტუციო სასამართლოში მიმდინარე განმწესრიგებელი სხდომა დასრულდა. მოსამართლეები სათათბიროდ გავიდნენ; შესაძლოა, დღესვე გადაწყდეს, მიიღებს თუ არა საკონსტიტუციო სასამართლო „TV საქართველოსა" და ძმები ყარამანიშვილების სარჩელს წარმოებაში.
დღეს დილიდან პროცესზე მოსამართლეები და ადვოკატები კითხვებს უსვამდნენ პარლამენტის იურისტების მოთხოვნით მოწვეულ სპეციალისტს. კითხვებზე პასუხის გაცემა მოუხდათ ძმები ყარამანიშვილების და „ტელეკომპანია საქართველოს" ადვოკატებსაც.
ორივე მხარის იურისტები საკონსტიტუციო სასამართლოსგან მისთვის მისაღები გადაწყვეტილებას ელოდებიან. პარლამენტის წარმომადგენელიდარწმუნებულია, რომ მისი არგუმენტები სასამართლოსთვის დამაჯერებელია.
„ვფიქრობ, რომ პარლამენტმა შეძლო დაერწმუნებინა სასამართლო კოლეგია იმაში, რომ უმეტეს წილად მოსარჩელის მოთხოვნა არის დაუსაბუთებელი და სადავო ნორმების შეჩერება გამოიწვევს ერთი კერძო პირის ინტერესების მეორე კერძო პირის ინტერესების მიმართ უპირატესობის მინიჭებას და საჯარო ინტერესის უგულებელყოფას, რაც არის გადაწყვეტილების აღსრულება", - აცხადებს პარლამენტის წარმომადგენელი.
ძმები ყარამანიშვილების და „ტელეკომპანია საქართველოს" ადვოკატები კი იმედოვნებენ, რომ საკონსტიტუციო სასამართლო დაიცავს „რუსთავი 2"-ს, სიტყვის თავისუფლებასა და დემოკრატიის არსებობას ქვეყანაში.
„ვფიქრობ, ჩვენ ვიხილეთ ნამდვილი სასამართლო აქ, იმედი გვაქვს, რომ შედეგი იქნება მოსარჩელის სასარგებლოდ. იმედს ვამყარებთ, რომ საკონსტიტუციო იმსჯელებს ობიექტურად და ის შეუქცევადი ზიანი, რომელიც ადგება მაუწყებელს, თავიდან იქნება აცილებული", - აცხადებს თამთა მურადაშვილი.
