სოციალურ ქსელში გავრცელდა მოსკოველი ჟურნალიტის დმიტრი კ.-ს ბლოგის საფუძველზე შექმნილი ვიდეო "პუტინი განრისხებულია. მრცხვენია, რომ რუსი ვარ", რომელიც როგორც თავად რგოლის სათაურშია მითითებული, რუსეთში აკრძალულია.
ვიდეოში საუბარია რუსეთის მიერ ყირიმის ოკუპაციასა და რუსულ ნაციონალიზმზე.
"ახლა ფრაზის თქმა, „მე ვარ რუსი" მხოლოდ ჩურჩულით შეიძლება. მრცხვენია, რომ ვარ რუსი. მადლობა ვლადიმერ ვლადიმეროვიჩ", - ამბობს ჟურნალისტი.
მისი თქმით, პუტინმა მიაღწია თავისას და რუსებს უკრაინელები უკვე მტრები ჰგონიათ.
„... ჩვენ არ ვმალავთ საკუთარ რასიზმს და უცხო ეროვნების ხალხისადმი შეუგუებლობას. სიამოვნებით ვატარებთ სვასტიკას, რომელსაც სლავურ ფუძეს მივაწერთ. ჩვენი პრეზიდენტი კი უფრო შორს მიდის. ვლადიმირ პუტინი ესესხება შიდა პოლიტიკურ სტრატეგიას და ადოლფ ჰიტლერის გამოსვლებს. რუსული პროპაგანდა კი, იოსებ გებელსის საუკეთესო ტრადიციების მიხედვით მიმდინარეობს. პუტინმა უკრაინასთან ნამდვილი ომი დაიწყო, თუმცა, ჩვენ რუსებს არ გვჯერა ამის, ტელევიზორიდან ამის შესახებ ხომ არაფერი გვითხრეს. ჩვენთვის პუტინი გმირია, რუსული მიწების შემგროვებელი! ჩვენ თავშიც არ მოგვივა, რომ ვლადიმერ ვლადიმეროვიჩმა ყირიმში ომი წამოიწყო იმისთვის, რომ იმაზე აღარასდროს დავფიქრებულიყავით, თუ რამდენი მოიპარა!..." - ამბობს მოსკოველი ჟურნალისტი დმიტრი კ.
ვიდეო "იუთუბზე" 2 დღის წინ აიტვირთა და ამ დროისათვის ის 245 ათასამდე მომხმარებელმა ნახა.
