ზურაბ ადეიშვილის ადვოკატმა ოთარ კახიძემ ვანო მერაბიშვილისა და ზურაბ ადეიშვილის ახალი ბრალდების საქმეზე ბრალის დადგენილების გაცნობის შემდეგ განაცხადა, რომ ბრალდების დადგენილება იმდენად აბსურდული და ბუნდოვანია, რომ კომენტარის გაკეთება უჭირს.
მისი თქმით, დადგენილებაში არ არის განმარტებული, თუ რა სახის მუქარა ან ზეწოლა განხორციელდა ზურაბ ადეიშვილის მხრიდან.
„რა ზიანი მიადგა სახელმწიფოს სახელმწიფო ქონების გადაცემით, ეს გაუგებარია. ამგვარი ზიანი არ შეიძლება არსებობდეს. ამავე დროს ამ პირებს, რომლებიც დაზარალებულად არიან ცნობილი, კრედიტები ჩამოეწერათ ქონების გადაცემის შედეგად. კერძოდ, რა თანხაც აიღეს კრედიტის სახით და რა თანხადაც შეიძინეს ეს ქონება, ის ჩამოეწერათ. ამ პირებს რა ზიანი მიადგათ, ესეც ბუნდოვანია", - განაცხადა ოთარ კახიძემ.
მისი თქმით, 2015 წლის ბოლოს საქართველოს პროკურატურა რომ დაკავებულია 2004 წლის საქმეების ქექვით, ამაზე სერიოზულ კომენტარს ვერ გააკეთებ.
პროკურატურამ ზურაბ ადეიშვილი და ვანო მერაბიშვილი ქონების უკანონოდ ჩამორთმევის საქმეზე პასუხისგებაში მისცა.
