სააგენტო „ფრანს პრესის" ცნობით, პარიზის სან-დენის რაიონში  ტერორისტმა ქალმა თავი აიფეთქა.

„ორი ტერორისტი მკვდარია, მათ შორის ქალი, რომელმაც ე.წ. „შაჰიდის ქამარი" აამოქმედა", - იუწყება სააგენტო.

თავის მხრივ, ფრანგული რადიოსადგური RTL იტყობინება, რომ მოკლულ ტერორისტთა შორის ტერორისტი ქალია, რომელმაც თავის აფეთქება ვერ მოასწრო.

ამ წუთებში ანტიტერორისტული ოპერაციის აქტიური ფაზა მიმდინარეობს. „BBC~-ის ცნობით, რაიონში, რომლის ყველა შესასვლელი გადაკეტილია, სულ მცირე 7 აფეთქება მოხდა.

სააგენტო „როიტერი" წერს, რომ სამართალდამცველები კიდევ ორი ეჭვმიტანილის ნეიტრალიზების ოპერაციას ატარებენ. პირველადი ინფორმაციით, ტერორისტთა ჯგუფი სან-დენის რაიონის ერთ-ერთ ბინაში ჩაიკეტა.

მედია ასევე წერს, რომ სპეცოპერაციის დროს დაიჭრა სულ მცირე ერთი სამართალდამცველი. ადგილზე მობილიზებულია სპეცდანიშნულების ძალები და 50-მდე სამხედრო.