დეპუტატი მარიკა ვერულაშვილი მისი თავმჯდომარეობით ახალი საპარლამენტო ფრაქციის ფორმირების შესაძლებლობას არც გამორიცხავს და არც ადასტურებს.
მისი განცხადებით, ფრაქციის შექმნის საკითხი "ნაციონალური მოძრაობიდან" გასულ ექვს მაჟორიტარ დეპუტატს შორის განხილვის საგანი ჯერ არ ყოფილა.
"ლოგიკურია საუბარი ახალი ფრაქციის შექმნის შესახებ, რადგან მას შემდეგ, რაც დეპუტატმა ანზორ ბოლქვაძემ უმცირესობა დატოვა, ექვსი დამოუკიდებელი მაჟორიტარი გაჩნდა და გაჩნდა კითხვა, შეიქმნებოდა თუ არა ფრაქცია. ექვსი მაჟორიტარიდან ერთ-ერთს, იაშა შერვაშიძეს ძმა გარდაეცვალა, რის გამოც დეპუტატების შეკრება ვერ მოხერხდა. შესაბამისად, ჯერ არაფერზე გვიმსჯელია. სავარაუდოდ, შევიკრიბებით და ვიმსჯელებთ. დღეის მდგომარეობით გადაწყვეტილი არაფერია", - აღნიშნა ვერულაშვილმა. "ნაციონალური მოძრაობიდან" გასული მაჟორიტარების შემადგენლობით პარლამენტში კიდევ ერთი ფრაქცია იქმნება. ფრაქციის შემადგენლობაში ერთიანდებიან დეპუტატები: გოჩა ენუქიძე, იაშა შერვაშიძე, გურამ მისაბიშვილი, გიორგი ფეიქრიშვილი, ანზორ ბოლქვაძე და მარიკა ვერულაშვილი, რომელმაც გავრცელებული ინფორმაციით, შესაძლოა ფრაქციის თავმჯდომარეობა ჩაიბაროს. გოჩა ენუქიძემ ფრაქციის ფორმირებისთვის მზადება დაადასტურა. მისი თქმით, შეკრება 26 ივლისისთვის იგეგმება, დეტალები კი უახლოეს ორ დღეში გახდება ცნობილი. "რაც შეეხება ფრაქციის თავმჯდომარეს, ეს თანამდებობა ექვსი დეპუტატიდან ნებისმიერმა შეიძლება დაიკავოს, მათ შორის მარიკამ! ყველაფერს ორ დღეში გადავწყვეტთ", - განაცხადა ენუქიძემ.
